Mynd: EPA
Athugið þessi frétt er meira en 1 mánaða gömul.
Dularfullur dauði pelíkana í Senegal
Umhverfisyfirvöld í Senegal rannsaka nú dauða 750 pelíkana sem fundust í norðanverðu landinu. Fuglarnir voru allir í Djoudj fuglaathvarfinu í votlendinu við landamærin að Máritaníu. Þangað leita milljónir farfugla á hverju ári, og er svæðið á heimsminjaskrá Mennta- og menningarmálastofnunar Sameinuðu þjóðanna, UNESCO.
Bocar Thiam, yfirmaður þjóðgarðastofnunar Senegal sagði í viðtali að yfirvöld hafi tekið sýni úr fuglunum til greiningar. Guardian hefur eftir honum að vonast sé til þess að fá niðurstöður sem allra fyrst.
Um 350 fuglategundir leita á þessar slóðir en aðeins pelíkanar fundust dauðir. 740 voru ungir fuglar og tíu þeirra fullorðnir. Athvarfinu hefur verið lokað á meðan rannsókn á dauða pelíkananna fer fram.
Fyrr í mánuðinum greindu yfirvöld frá útbreiðslu H5N1 fuglaflensunnar á alifuglabúi. Það var í Thies-héraði, nærri 200 kílómetrum frá Djoudj. Þar varð að slátra um 100 þúsund kjúklingum vegna flensunnar.
