Athugið þessi frétt er meira en 1 mánaða gömul.

Vilja að samgöngur til Fjallabyggðar verði bættar

27.01.2021 - 11:10
Mynd með færslu
 Mynd: RÚV - Björgvin Kolbeinsson
Bæjarráð Fjallabyggðar krefst þess að stjórnvöld bregðist við samgönguvanda sveitarfélagsins, sem hafi að undanförnu þurft að búa við að Ólafsfjarðarvegur og Siglufjarðarvegur, tengingar Fjallabyggðar við nágrannasveitarfélög og landið allt, hafi ítrekað lokast vegna ófærðar, snjóflóða og snjóflóðahættu.

Ekki sé hægt að sætta sig við að fram undan séu að óbreyttu áratugir án úrbóta í samgöngumálum sveitarfélagsins. Hefjast þurfi handa nú þegar við undirbúning nauðsynlegra framkvæmda við að leysa af hólmi veginn um Ólafsfjarðarmúla og veginn um Almenninga. 

Katrín Sigurjónsdóttir, sveitarstjóri Dalvíkurbyggðar, segir viðvarandi snjóflóðahættu í Ólafsfjarðarmúla hafa valdið því að leiðin hafi verið lokuð í meira en 30 daga í fyrra. „Það er slæmt, sérstaklega fyrir íbúa Fjallabyggðar.“

Rætt var við Katrínu Sigurjónsdóttur í Morgunútvarpinu á Rás 2 í morgun um ástandið í hennar sveitarfélagi. Mikið fannfergi hefur verið víða á landinu undanfarið, leiðindaveður og óvissustig vegna snjóflóðahættu á Norður- og Austurlandi sem og norðanverðum Vestfjörðum. 

„Við höfum sem betur fer ekki verið með snjóflóðahættu sem hefur ógnað byggð hjá okkur en auðvitað er þetta viðvarandi alltaf í Ólafsfjarðarmúla á milli gangamunnans til Fjallabyggðar og Dalvíkur. Það hefur valdið því að það er oft lokað og ég man ekki hvað það voru margir dagar í fyrra, eitthvað yfir 30 dagar, sem var lokað þessi leið. Það er slæmt, sérstaklega svo sem fyrir íbúa Fjallabyggðar.“