Athugið þessi frétt er meira en 4 mánaða gömul.

Auðkýfingur villti á sér heimildir fyrir bóluefni

27.01.2021 - 05:58
epa07285166 A Canadian flag flies at the Canadian embassy in Beijing, China, 15 January 2019. A Chinese court issued a death sentence to Robert Lloyd Schellenberg of Canada for drug smuggling. On 14 January 2019, following an appeal, a high court in Dalian city changed the man's previous 15 years in prison sentence for drug smuggling and sentenced him to death, saying his previous sentence was too lenient, according to media reports. The ruling comes during a diplomatic row between Canada and China after Canadian authorities arrested Meng Wanzhou, an executive for Chinese telecommunications firm Huawei, at the request of the USA.  EPA-EFE/ROMAN PILIPEY
 Mynd: epa
Kanadamaðurinn Rod Baker varð að segja sig frá stjórnunarstörfum spilavítakeðjunnar Great Canadian Gaming eftir að hann reyndi að villa á sér heimildir. Hann og eiginkona hans, leikkonan Ekaterina Baker, flugu í einkaþotu frá Vancouver til smábæjarins Beaver Creek til þess að fá bóluefni við COVID-19.

Baker-hjónin þóttust starfsmenn á vegahóteli í nágrenni bæjarins, sem er við landamærin að Alaska. Svæðið er að miklu leyti búið þjóðum innfæddra, og langt í næsta sjúkrahús. Íbúar héraðsins eru því í talsverðri hættu nái veiran að breiða úr sér meðal þeirra. Bólusetning gengur hraðar þar en annars staðar í Kanada, samkvæmt gögnum fréttastofu BBC. 

Málið vakti mikla reiði í Yukon-fylki og víðar í Kanada eftir að upp komst um hjónin. Vegfarendur áttuðu sig á lyginni þegar þau óskuðu eftir fari á flugvöllinn um leið og þau voru búin að fá sprautuna. Samkvæmt héraðsmiðlinum New Hamburg Independent vildi enginn bjóða þeim far, og urðu þau því að labba alla leið á flugvöllinn, þar sem einkaþotan beið þeirra. 

Dæmi um áframhaldandi kúgun innfæddra

John Streicker, yfirmaður félagsmála í Yukon, segist ævareiður yfir sjálfselsku Baker-hjónanna. Yfirvöldum hafi ekki dottið í hug að nokkur myndi ganga svona langt í blekkingum til þess að fá bóluefni. Angela Demit, foringi White River þjóðarinnar, skrifaði á Facebooksíðu sína að þjóðin harmi hegðun einstaklinga sem stefni öldruðum og viðkvæmum í hættu í algjörri eigingirni. Janet Vander Meer, stjórnandi viðbragðsteymis White River þjóðarinnar við kórónuveirunni, segir þetta dæmi sýna áframhaldandi kúgun ríkra gagnvart þjóðum innfæddra. Elsti íbúi Beaver Creek, 88 ára gamall, fékk bóluefnið á sama tíma og Baker hjónin. Vander Meer segir það hljóta að varða fangelsisvist, annað væri óhugsandi.

Spilavítakeðjan Great Canadian Gaming sendi fréttastofu BBC yfirlýsingu þar sem segir að fyrirtækið hafi slitið öll tengsl við Baker á sunnudag. Stjórn fyrirtækisins líði ekki að starfsmenn þess gangi gegn gildum fyrirtækisins. 

Róbert Jóhannsson
Fréttastofa RÚV