Sjúkrabíll frá Húsavík tekur á móti sjúkrabíl og björgunarsveitarmönnum frá Þórshöfn Mynd: Björgunarsveitin Hafliði - Facebook
Athugið þessi frétt er meira en 1 mánaða gömul.
Sjúkraflutningur í kafaldsbyl og ófærð
Björgunarsveitarmenn á Þórshöfn og víðar á Norðausturhorninu unnu þrekvirki í gær þegar koma þurfti sjúklingi frá Þórshöfn til Akureyrar með hraði í ófærð og þreifandi byl.
Í færslu á Facebook-síðu björgunarsveitarinnar Hafliða á Þórshöfn segir að mjög slæmt veður hafi komið í veg fyrir að sjúkraflugvél gæti lent á Þórshöfn og Vopnafirði og því ekki annað í boði en að flytja sjúklinginn landleiðina. Þar sem veður og færð voru með versta móti var viðbúnaður með mesta móti.
Auk björgunarsveitarinnar Hafliða voru ræstar út björgunarsveitir á Raufarhöfn og Húsavík, sjúkrabíll frá Þórshöfn og Húsavík og snjómokstursmenn allt frá Þórshöfn til Akureyrar.
„Eftir hetjulega baráttu við ófærð og veður komumst við yfir Hófaskarðið þar sem björgunarsveitin Garðar og sjúkrabíll frá Húsavík tóku við sjúklingnum og komu honum til Akureyrar,“ segir í færslu Hafliðamanna. Þar segir enn fremur að stjórn sveitarinnar vilji koma á framfæri þökkum til allra sem tóku þátt í aðgerðinni. „Gott skipulag, samtal, samvinna og liðsheild gerði það að verkum að markmiðið náðist og getum við verið stolt af því:)“
Sjá má nokkur myndskeið frá svaðilförinni á Facebook-síðu Hafliða.
