Athugið þessi frétt er meira en 8 mánaða gömul.

Rýmingu aflétt á Siglufirði — Vegfarendur sýni aðgát

24.01.2021 - 17:28
Mynd með færslu
 Mynd: RÚV - Björgvin Kolbeinsson
Rýmingu vegna snjóflóðahættu á Siglufirði hefur verið aflétt en vegfarendur eru beðnir um að hafa varann á á svæðum þar sem snjóflóð geta fallið. Þetta kemur fram í nýrri tilkynningu frá almannvarnadeild ríkislögreglustjóra og lögreglustjóranum á Norðurlandi eystra. Óvissustig er enn í gildi vegna snjóflóðahættu á Norðurlandi.

Í tilkynningunni segir að ákveðið hafi verið að aflétta rýmingu húsa á sunnanverðum Siglufirði sem rýmd voru í öryggisskyni á miðvikudag vegna snjóflóðahættu. Dregið hafi úr veðrinu frá því í gær og á föstudag og minni úrkoma mælst á sjálfvirkum úrkomumælum. Þá hafi vindur fyrir Norðurlandi snúist meira til austurs, en það er talið draga úr hættu á snjóflóðum úr Hafnarfjalli.

Áfram hætta á ferðum

Áfram varað við snjóflóðahættu þar sem snjóalög kunna enn að vera óstöðug, til dæmis sunnan við leiðigarðinn Stóra-Bola, þó rýmingu húsa neðan garðsins hafi verið aflétt. Í tilkynningu almannavarna segir að þar þurfi að sýna sérstaka aðgæslu. Þó er fólk beðið um að vera ekki á ferli ofan við varnargarða.

Óvissustig á Norðurlandi enn í gildi

„Tilefni er til þess að árétta að óvissustig vegna snjóflóðahættu á Norðurlandi er enn við líði. Stór snjóflóð hafa fallið undanfarna daga á Tröllaskaga, m.a. við Smiðsgerði í austanverðum Skagafirði, á Öxnadalsheiði og á Ólafsfjarðarveg, síðast núna í morgun þegar snjóflóð féll yfir veginn um Öxnadalsheiði,“ segir í tikynningunni og að því þurfi vegfarendur og ferðalangar að hafa varann á þegar þeir fara um svæði þar sem snjóflóð geta fallið.

Rok og éljagangur í dag og á morgun

Búist er við norðaustanstrekkingsvindi og éljum í dag og á morgun. Veðurstofan fylgist áfram með aðstæðum. Enn er óvissa um hversu mikil ofankoma verður í éljaganginum næstu tvo sólarhringa, en það ræður miklu um hversu mikil snjóflóðahætta skapast á hverjum stað.

Áfram slæm færð

Vegfarendur eru hvattir til að leita sér upplýsinga um færð á vegum áður en lagt er af stað í ferðalög, þótt vel hafi gengið að hreinsa vegi. 

„Mikill snjór er nú í fjöllum á Norðurlandi og má búast til viðvarandi snjóflóðahættu á slóðum sem vélsleðamenn og fjallaskíðafólk sækir.  Veðurstofan gerir svæðisbundna snjóflóðaspá fyrir norðanverðan Tröllaskaga, en utan þess spávæðis má búast við svipuðum aðstæðum þrátt fyrir að ekki sé sérstaklega fylgst með þeim svæðum eða viðvaranir settar út.,“ segir í tilkynningunni.

hildurmj's picture
Hildur Margrét Jóhannsdóttir
Fréttastofa RÚV