Athugið þessi frétt er meira en 1 mánaða gömul.

Jóna sækist eftir forystusæti Samfylkingar í Kraganunum

24.01.2021 - 15:29
Mynd með færslu
 Mynd: Aðsend mynd - RÚV
Jóna Þórey Pétursdóttir hefur gefið kost á sér í forystusveit Samfylkingarinnar í Suðvesturkjördæmi, Kraganum. Hún var forseti Stúdentaráðs Háskóla Íslands. Hún segir það vera mikla áskorun og ábyrgð að stíga fram en hún telji mikilvægt að ungt fólk hafi málsvara í forystusætum framboðslista.

Jóna gaf frá sér tilkynningu í morgun þar sem hún boðar framboð sitt formlega.

„Eftir langa umhugsun og hvatningu hef ég ákveðið að taka áskoruninni um að gefa kost á mér í forystusveit fyrir Samfylkinguna í Suðvesturkjördæmi.Það er vissulega mikil áskorun og ábyrgð að stíga fram á þessum vettvangi en ég tel mikilvægt að ungt fólk hafi málsvara í forystusætum framboðslista og taki virkan þátt í pólitík, sérstaklega á þessum tímum,“ segir í tilkynningunni.

„Sem forseti Stúdentaráðs tók ég þátt í skipulagningu loftslagsverkfallanna á Íslandi og beitti mér fyrir raunverulegum aðgerðum í loftslagsmálum. Ég vil halda áfram þeirri baráttu sem þingkona og vel Samfylkinguna vegna þess að hún er sá stjórnmálaflokkur sem er tilbúinn að gera það sem þarf til að hefja kraftmikla græna uppbyggingu á Íslandi. Með reynsluna af hagsmunabaráttu stúdenta í farteskinu er ég líka sannfærð um að hagsmunum námsfólks sé best borgið með Samfylkinguna í forystu og ungu fólki í leiðandi hlutverki. Stjórnvöld hafa hvorki brugðist við ákalli ungs fólks um aukið afkomuöryggi og bætt kjör, né þeim áskorunum sem við stöndum frammi fyrir vegna hamfarahlýnunar. Á næsta kjörtímabili stefnir í endurskoðun á nýjum lögum um Menntasjóð námsmanna og þar er verk að vinna. Þá er ljóst að velferðarkerfið er götótt og fjöldi fólks á öllum aldri lendir milli skips og bryggju. Vilji Samfylkingarinnar til að gera betur í velferðarmálum er áþreifanlegur og þessum málstað þarf að halda á lofti. Leiðarljós jafnaðarstefnunnar duga best til að skapa réttlátt samfélag þar sem við sitjum öll við sama borð,“ segir jóna.

Áður hefur Rósa Björk Brynjólfsdóttir þingmaður gefið það út að hún sækist eftir að leiða listann í Suðvesturkjördæmi. Þá hefur Guðmundur Andri Thorsson, þingmaður, einnig gefið það út að hann sækist eftir áframhaldandi þingsetu og sæti ofarlega á lista þar af leiðandi. Uppstillingarnefnd sér um að raða upp lista flokksins, en ekkert prófkjör fer fram.