Athugið þessi frétt er meira en 1 mánaða gömul.

Búið að aflétta rýmingum á Flateyri

24.01.2021 - 15:02
Flateyri í Önundarfirði janúar 2020
 Mynd: Elsa María Guðlaugs Drífudót - RÚV
Búið er að aflétta rýmingum í fjórum íbúðarhúsum á Flateyri sem voru rýmd í gær auk bensínstöðvarinnar í þorpinu. Rýmingar í atvinnuhúsnæði á Ísafirði eru enn í gildi. Búið er að opna veginn frá Ísafirði til Súðavíkur og vonir standa til að hægt verði að opna Steingrímsfjarðarheiði síðar í dag.

Þetta kemur fram í tilkynningu frá Lögreglunni á Vestfjörðum.

„Samkvæmt ráðgjöf frá ofanflóðaeftirliti Veðurstofunnar hefur verið ákveðið að aflétta rýmingu á Flateyri. Þannig mega íbúar þeirra þriggja íbúðarhúsa, sem þurftu að yfirgefa heimili sín í gær, halda heim. Sömuleiðis er talið óhætt að dvelja á hafnarsvæðinu og viðvörunarljósið verður slökkt. Það kunnu að falla litlar meinlausar spýjur ofan varnargarðsins og er því fólk hvatt til þess að halda sig neðan garðsins. Flateyrarvegur er enn lokaður af öryggisástæðum en skoðun stendur yfir m.t.t. hvort óhætt verði að opna hann. Það skýrist þegar líður á daginn. Upplýsingar um framvindu þess má sjá á vefsíðu Vegagerðarinnar og eins í upplýsingasímanum 1777. Enn er í gildi rýming atvinnuhúsa í Skutulsfirði, sem rýmd voru á föstudaginn. Þetta er húsnæði Fjarðarnets og Terra við Skutulsfjarðarbraut og sorpmótaka Terra í botni fjarðarins. Staðan verður metin í fyrramálið, hvort óhætt verði talið að aflétta rýmingu þar. Þá hefur verið ákveðið að opna veginn milli Ísafjarðar og Súðavíkur og eins áformar Vegagerðin að opna veginn áfram suður yfir Steingrímsfjarðarheiði. Varðandi framvindu opnunar vegarins er hvatt til þess að fylgst verði með á heimasíðu Vegagerðarinnar og/eða upplýsingasíma VR, 1777. Vegurinn upp á Seljalandsdal í Skutulsfirði er enn lokaður en enn eru óhlaupin gil þar fyrir ofan og ekki talið óhætt að opna veginn í dag. Vegurinn um Eyrarhlíð var opnaður fyrr í dag, en honum var lokað í nótt vegna snjóflóðahættu. Fólk er þó beðið um að fara veginn ekki að óþörfu og gæta varúðar ef nauðsynlegt er að aka hann,“ segir á Facebook síðu lögreglunar.

Snjóflóð féll úr Skollahvilft ofan Flateyrar í nótt. Flóðið náði ekki niður að varnargarðinum. Þá féll snjóflóð á veginn um Eyrarhlíð milli Ísafjarðar og Hnífsdals og lokaði honum. Að óbreyttu verður rýming áfram í gildi á Siglufirði en þar hefur verið hættustig vegna snjóflóðahættu síðan á fimmtudag. Týr, varðskip Landhelgisgæslunnar, þurfti að sækja veikan mann þangað í gærkvöld og flytja sjóleiðina til Akureyrar.