Athugið þessi frétt er meira en 4 mánaða gömul.

Mun fleiri íbúðir seljast á meira en ásettu verði

22.01.2021 - 11:21
Mynd með færslu
 Mynd: Hjalti Haraldsson - RÚV
Hækkun íbúðaverðs á tólf mánaða tímabili hefur ekki verið meiri síðan í febrúar 2018, að því er kemur fram í Hagsjá Landsbankans. Þá kemur einnig fram að vaxtalækkanir hafi aukið eftirspurn og þannig þrýst verðinu upp. Mun fleiri íbúðir hafi í fyrra selst yfir ásettu verði. Á höfuðborgarsvæðinu hafi það hlutfallið hækkað 8% árið 2019 í 22% undir lok síðasta árs. „Svona hátt hlutfall íbúða hefur ekki selst yfir ásettu verði síðan 2017,“ segir í Hagsjánni

Sé horft til breytingar á meðaltali vísitölunnar milli ára hækkaði íbúðaverð alls um 4,8% í fyrra, sem er nokkuð nálægt því sem við spáðum í október (4,5%) en talsvert ofar því sem við spáðum í vor (2%), þegar áhrif faraldursins á fasteignamarkað voru mun óljósari. Frá aldamótum hefur íbúðaverð að jafnaði hækkað um 9% á ári. Hækkunin í fyrra er því alls ekki mikil í sögulegu samhengi þó hún sé nokkur í ljósi þess að nú ríkir mikill efnahagssamdráttur.

Þetta kemur fram í hagsjánni. Viðskipti hafi einnig aukist til muna eða um 14%. Líklegt sé að innstæða sé fyrir verðhækkunum á íbúðum. „Þessi tengsl eru þó ekki alltaf augljós og er því langt frá því að vera einfalt að spá fyrir um þróun verðlags út frá viðskiptum einum og sér, eða öfugt, enda margir aðrir þættir sem geta haft áhrif á þróun fasteignamarkaðarins,“ segir í Hagsjá Landsbankans.