Athugið þessi frétt er meira en 1 mánaða gömul.

Fyrsta lífsmarkið frá Jack Ma um margra mánaða skeið

21.01.2021 - 01:55
epa08430633 (FILE) - Jack Ma, co-founder and former executive chairman of Chinese e-commerce company Alibaba Group attends the Kyiv International Economic Forum in Kiev, Ukraine, 08 November 2019 (reissued 18 May 2020). Reports on 18 May 2020 state Jack Ma has resigned from Japanese SoftBank's board. SoftBank on 18 May 2020 said its Vision Fund had suffered a 18 billion USD loss.  EPA-EFE/SERGEY DOLZHENKO
Jack Ma. Myndin er tekin á viðskiptaráðstefnu í Kænugarði í Úkraínu haustið 2019. Mynd: epa
Kínverski auðkýfingurinn Jack Ma, stofnandi og eigandi netverslunarrisans Alibaba, kom fram á opinberum vettvangi í gær, í fyrsta skipti síðan kínversk yfirvöld tóku að rannsaka fyrirtækjasamsteypu hans og hlutast til um rekstur hennar í haust sem leið. Ma ávarpaði hóp kennara í gegnum fjarfundabúnað.

Fjarvera Mas síðustu vikur og mánuði kynti undir vangaveltur, sögusagnir og samsæriskenningar um örlög hans, á sama tíma og kínversk samkeppnisyfirvöld gerðu húsleit í fyrirtækjum hans og fyrirskipuðu að móðurfyrirtækið, Ant Group, skyldi leyst upp í smærri einingar. Í gær ávarpaði milljarðamæringurinn Ma hins vegar 100 kennara í dreifbýli Kína í gegnum fjarfundabúnað.

Frá þessu er greint í kínverskum fjölmiðlum. Er ávarpið sagt hluti af dagskrá árlegrar uppákomu á vegum góðgerðastofnunar sem Ma rekur. Sú uppákoma er venjulega mikil og fjölmenn samkoma í borginni Sanya, en var að þessu sinni alfarið haldin á netinu vegna COVID-19.

Ekki hægt að sjá hvar Ma er staddur

Í ávarpinu sagðist Ma vonast til þess að hægt verði að hittast aftur í miklum fögnuði í Sanya þegar kófinu léttir. Ávarpið hefur þó ekki megnað að kveða niður allar vangaveltur og sögusagnir um hvar Ma er niðurkominn.

Í myndskeiðinu talar Ma beint í myndavélina. Hann er íklæddur ljósblárri peysu og í bakgrunninum sést lítið annað en gráir marmaraveggir og röndótt teppi. Af orðum Mas, bakgrunni og fréttum kínverskra fjölmiðla, verður þó hvorki ráðið hvar hann er staddur, né hvort hann er frjáls ferða sinna.