Þórunn Egilsdóttir gefur ekki kost á sér áfram

Mynd með færslu
 Mynd: Kosningavefur - RÚV
Þórunn Egilsdóttir, oddviti Framsóknarflokksins í Norðausturkjördæmi á Alþingi, ætlar ekki að bjóða sig fram að nýju fyrir Alþingiskosningar í haust. Þórunn greinir frá þessu á Facebook.

Þórunn hefur verið þingmaður síðan 2013 og varð oddviti flokksins í Norðausturkjördæmi fyrir þingkosningarnar 2016. Hún greindist með krabbamein í upphafi árs 2019 og tók sér leyfi frá þingstörfum á meðan hún var í krabbameinsmeðferð.

„Það ferli tókst vel og ég tók brött aftur til starfa síðastliðið vor enda meinið horfið. Ég var full bjartsýni, trúði að þetta væri farið og hugðist halda ótrauð áfram. Ég var sömuleiðis full orku og mig langaði að láta áfram til mín taka á þessum vettvangi og gefa kost á mér til þess að leiða framboðslista Framsóknarflokksins í kjördæminu næsta kjörtímabil,“ skrifar Þórunn.

Veikindin hafa nú aftur gert vart við sig og Þórunn greindi frá því í vetur að hún hafi aftur greinst með krabbamein. „Í lok árs 2020 fór ég að finna fyrir óþægindum og rannsóknir bentu til að eitthvað þyrfti að skoða betur. Þá kom í ljós að lifrin starfaði ekki eðlilega. Meinið hefur tekið sig upp að nýju en brýnt er að vera bjartsýn. Maður verður alltaf að horfa fram á við. Og maður má aldrei missa vonina. Aldrei.“

„Framboð til Alþingis verður hins vegar að bíða betri tíma. Ég mun því ekki gefa kost á mér til að leiða lista Framsóknarflokksins í Norðausturkjördæmi í komandi alþingiskosningum,“ skrifar Þórunn.

Þórunn segir í pistli sínum á Facebook að flokkur hennar hafi komið miklu til leiðar með samvinnu og áræðni. Hún eftirláti góðu fólki að taka við af sér. „Við félagshyggju- og samvinnufólk eigum gott fólk með mikla reynslu og skýra sýn sem vill láta gott af sér leiða og er tilbúið í verkefnið. Ég vona og veit að okkur ber gæfa til að starfa saman enda er það lykillinn að árangri.“

birgirthh's picture
Birgir Þór Harðarson
Fréttastofa RÚV