Athugið þessi frétt er meira en 2 mánaða gömul.

Skoða hvort almannahætta hafi skapast við Glerárskóla

12.01.2021 - 15:59
Mynd með færslu
 Mynd: Óðinn Svan Óðinsson - RÚV
Rannsókn á upptökum eldsins sem kom upp við Glerárskóla á Akureyri í síðustu viku er á frumstigi. Til greina kemur að fá dómkvaddan matsmann til að leggja mat á hvort almannahætta hafi skapast þegar þrír piltar, sem hafa gefið sig fram, sprengdu flugelda við skólann.

Þrír piltar gáfu sig fram

Skömmu eftir að eldurinn kom upp í skólanum gáfu þrír piltar sem fæddir eru árið 2004 og 2005 sig fram við lögreglu og viðurkenndu að hafa verið að sprengja flugelda við skólann skömmu áður en eldurinn braust út. 

Málið enn á frumstigi

Bergur Jónsson sem fer með rannsókn málsins segir að þrátt fyrir að piltarnir hafi viðurkennt að hafa verið með eld í kringum skólann þurfi að rannsaka málið betur. „Leggja þarf mat á það hversu mikið tjónið er og eins þarf að taka ákvörðun um hvort dómkveðja þurfi matsmenn til að leggja mat á hvort almannahætta skapaðist af þessari háttsemi. Því má segja að málið sé enn á frumstigi,“ segir Bergur. 

Kanna hvort um viljaverk hafi verið að ræða

Bergur segir ekki ljóst hvort um óviljaverk eða ásetning var að ræða, slíkt verði skoðað. „Það er alltaf hluti rannsóknar lögreglu að kanna huglæga afstöðu til verknaðar sem til rannsóknar er og þá eins hvort sú huglæga afstaða hafi einnig náð til afleiðinganna.“