Athugið þessi frétt er meira en 2 mánaða gömul.

COVID-19 smit á hjartadeild LSH – deildinni lokað

12.01.2021 - 18:59
Mynd: RÚV / RÚV
Búið er að loka hjartadeild Landspítalans eftir að sjúklingur þar greindist með COVID-19. Á annað hundrað manns eru í sóttkví vegna smitsins.

Smitið greindist við hefðbundna skimun í dag. Öllum innlögnum, valkvæðum aðgerðum og göngudeildarheimsóknum hefur verið frestað.  

Már Kristjánsson yfirlæknir  smitsjúkdómadeildar LSH ræddi við Hólmfríði Dagnýju Friðjónsdóttur í fréttum í kvöld.

Hann sagði að sjúklingurinn hafi legið inni síðan í desember og verið skimaður tvisvar áður, en ekki greinst þá með veiruna. Hann útskrifaðist í dag og greindist síðdegis jákvæður. Hann er talinn hafa greinst inni á deildinni, frá öðrum sjúklingi, starfsmanni eða aðstandanda sem heimsótt hefur deidina.

Hann segir ómögulegt að segja á þessu stigi hve alvarlegur atburðurinn er. Það þurfi að kortleggja  og vona það besta. Viðkomandi er með lítil eða engin einkenni. Ekki er ljóst hvort starfsfólk eða aðrir sem umgengust hann séu með einkenni.

Viðtalið má sjá í heild að ofan.

Landspítalinn gaf út eftirfarandi tilkynningu rétt í þessu: 

„Við hefðbundna skimun sjúklings vegna Covid-19 á hjartadeild 14EG Landspítala í kvöld, þriðjudaginn 12. janúar, kom í ljós að sjúklingur reyndist smitaður. Ekki liggur fyrir hvernig umræddur sjúklingur smitaðist, en þó liggur fyrir að viðkomandi smitaðist inniliggjandi á hjartadeild. Viðkomandi er nú á heimili sínu.

Lokað hefur verið fyrir innlagnir á hjartadeild, en bráðum innlögnum hjartasjúklinga verður sinnt á öðrum legudeildum. Öllum valkvæðum aðgerðum og göngudeildarheimsóknum á hjartadeild á morgun, miðvikudaginn 13. janúar, hefur verið frestað. Frekari upplýsinga um starfsemi hjartadeildar næstu daga á eftir er að vænta.

Farsóttarnefnd Landspítala kom þegar í stað saman ásamt stjórnendum hjartadeildar og ákveðið var að grípa til eftirfarandi ráðstafana: Skima alla sjúklinga (32 talsins), skima allt starfsfólk deildarinnar (á annað hundrað manns) og hafa samband við aðstandendur. Þessar aðgerðir standa núna yfir og verður fram haldið á morgun. Tryggt verður að þeir fari skimun sem þörf krefur.

Sóttvarnalæknir hefur verið upplýstur um málið og nú er unnið að smitrakningu innanhúss og meðal þeirra sem deildinni tengjast eftir atvikum.

Alltaf er hætta á því í heimsfaraldri eins og vegna Covid-19, að smit komi upp á einstökum deildum með þessum hætti, jafnvel þótt ítrustu sóttvarna og fyllstu varúðar og öryggis sjúklinga sé gætt. Margir tugir og jafnvel nokkur hundruð manns starfa á flestum stærri deildum Landspítala og þetta fólk er allt virkt upp að vissu marki í samfélaginu. Deildirnar þarf einnig að þjónusta af stórum hópi fólks í stoðdeildum spítalans. Sömuleiðis eru heimsóknir aðstandenda leyfðar upp að vissu marki.“

Fréttin hefur verið uppfærð

bjarnir's picture
Bjarni Rúnarsson
Fréttastofa RÚV
holmfridurdf's picture
Hólmfríður Dagný Friðjónsdóttir
Fréttastofa RÚV