Athugið þessi frétt er meira en 7 mánaða gömul.

Mike Pence andvígur því að víkja Trump úr embætti

epa08924042 US Vice President Mike Pence presides over a joint session of Congress to certify the 2020 Electoral College results after supporters of President Donald Trump stormed the Capitol earlier in the day on Capitol Hill in Washington, DC, 06 January 2021.  EPA-EFE/Erin Schaff / POOL
 Mynd: EPA-EFE - The New York Times POOL
Mike Pence, varaforseti Bandaríkjanna, er andvígur því að beita því ákvæði bandarísku stjórnarskrárinnar sem heimilar brottvikningu forsetans. Fjöldi Demókrata og nokkur hópur Repúblikana hefur lagt hart að honum að fara þá leið.

Varaforsetinn sjálfur hefur ekki tjáð sig opinberlega um málið en The New York Times hefur þessa andstöðu hans eftir nánum samstarfsmanni. Stjórnarskrárákvæðinu hefur aldrei verið beitt með þessum hætti sem gerði ákvörðun þess efnis afar sögulega.

Hávært ákall um brottvikningu Donalds Trumps Bandaríkjaforseta tók að heyrast eftir að stuðningsfólk hans ruddist inn í þinghúsbygginguna á Capitol-hæð í Washington í gær. Nancy Pelosi, forseti fulltrúadeildar þingsins, sagði í dag neyðarástand ríkja í landinu og að Trump bæri ábyrgð á áhlaupinu á þinghúsið.

Heimildamaður The New York Times segir viðhorf varaforsetans stutt af nokkrum ráðherrum ríkisstjórnarinnar en stuðning stjórnar þarf til að unnt sé að víkja forseta úr embætti.

Ráðherrarnir eru sagðir álíta að brottvikning auki frekar á þá upplausn sem nú ríkir í Washington en að draga úr henni. Demókratar í fulltrúadeildinni segjast tilbúnir að ákæra Trump fyrir embættisglöp verði honum ekki vikið úr stóli forseta.