Athugið þessi frétt er meira en 9 mánaða gömul.

Trump skorar á kjósendur að bjarga Bandaríkjunum

05.01.2021 - 05:54
epa08821908 (FILE) - US President Donald J. Trump speaks on the election night at an event at the White House in Washington, DC, USA, 04 November 2020 (15 November 2020). President Donald Trump has finally admit to losing the election in a tweet, after days of refusing to concede to President-elect Joe Biden.  EPA-EFE/CHRIS KLEPONIS / POOL
 Mynd: EPA-EFE - CONSOLIDATED NEWS PHOTOS POOL
Donald Trump Bandaríkjaforseti skoraði í gær á kjósendur í Georgíu að bjarga Bandaríkjunum og kjósa frambjóðendur Repúblikanaflokksins til öldungadeildar Bandaríkjaþings í dag.

Í áttatíu og einnar mínútu langri ræðu sem forsetinn hélt fyrir stuðningsmenn flokksins í borginni Dalton sagði Trump að róttækir Demókratarnir ætluðu sér að næla í öldungadeildarsætin í Georgíu til að geta náð ótakmörkuðu valdi yfir öllum þáttum daglegs lífs.

Trump varð tíðrætt um hve ótrauður hann hyggðist halda áfram að berjast fyrir áframhaldandi setu sinni í Hvíta húsinu. „Þeir taka ekki af okkur Hvíta húsið, við berjumst fyrir því af krafti,“ sagði Trump.

Hann biðlaði til Mike Pence, varaforseta síns, í ræðunni og sagðist vona að hann kæmi til bjargar. Forsetinn sagðist þess raunar fullviss að Pence leysti málið. 

Pence hefur lýst stuðningi við áform ellefu öldungadeildarþingmanna um að staðfesta ekki forsetakjör Joe Bidens á þingfundi á miðvikudag. Jafnframt hafa stuðningsmenn Trumps reynt að fá staðfest vald hans til að ógilda niðurstöður forsetakosninganna.