Athugið þessi frétt er meira en 9 mánaða gömul.

Óboðinn gestur í höll Japanskeisara

03.01.2021 - 08:03
Erlent · Asía · Innbrot · Japan · Japanskeisari · Keisari
epa08143552 Japan's Emperor Naruhito attends the opening of a regular parliamentary session at the upper house of the Diet in Tokyo, Japan, 20 January 2020. Emperor Naruhito presented his opening address to parliament members.  EPA-EFE/FRANCK ROBICHON
 Mynd: EPA-EFE - EPA
Tæplega þrítugur maður var handtekinn aðfaranótt sunnudags eftir að hafa hafst við í híbýlum Naruhitos Japanskeisara um tveggja klukkustunda skeið.

Maðurinn sem hefur ekki verið nafngreindur komst framhjá öflugri varðgæslu við gestahús hallarinnar. Liðsmenn varðliðs keisarans höfðu hendur í hári hans þar sem hann spókaði sig við vistarverur Yuriko prinsessu, afasystur Naruhitos.

Ekki er vitað til þess að maðurinn hafi átt samskipti við nokkurn úr keisarafjölskyldunni meðan á heimsókninni stóð. Fjölmiðlar í Japan segja þó engan hafa meiðst meðan á dvöl mannsins stóð í Akasaka höll.

Þetta er ekki í fyrsta sinn sem óboðnir gestir gera sig heimakomna í híbýlum Japanskeisara. Á síðasta ári synti maður yfir síki við höllina, kleif virkisvegg og komst inn á ytra garðsvæðið við höllina. 

Fyrir tæpum 40 árum, árið 1982 komst Michael Fagan, rúmlega þrítugur maður, inn í Buckingham-höll og alla leið í dyngju drottningar. Þar settist hann á rúmbrík hennar og spjallaði við hana í nokkar mínútur þar til hann var yfirbugður.