Athugið þessi frétt er meira en 6 mánaða gömul.

520 bólusettir á Norðurlandi í þessari lotu

29.12.2020 - 12:13
Mynd með færslu
 Mynd: Samsett mynd - RÚV
Fyrstu skammtar af bóluefni hafa borist heilsugæslunni á Norðurlandi en bóluefni verður afhent á starfsstöðvum HSN á Blönduósi, Sauðárkróki, Siglufirði, Dalvík, Akureyri og Húsavík í dag. Alls verða 520 bólusettir í þessari lotu.

Klára skammtinn í dag og á morgun

Þetta kemur fram í tilkynningu frá HSN í dag. þar segir að bólusetning með þessum fyrstu skömmtum ljúki í dag og á morgun. „Í þessari umferð munu íbúar á hjúkrunar- og dvalarheimilum á Norðurlandi verða bólusettir auk lækna og hjúkrunarfræðinga HSN sem sinna bráðaþjónustu, alls 520 manns,“ segir í tilkynningu.

Ekki hægt að panta bólusetningu

Það eru hjúkrunarfræðingar og læknar í heilsugæslu á HSN sem munu hafa umsjón með bólusetningunum í samvinnu við hjúkrunarfræðinga á hjúkrunar- og sjúkradeildum þeirra stofnana sem fá bóluefni að þessu sinni. Ekki verður hægt að panta bólusetningu heldur verður fólk látið vita hvenær því stendur til boða að mæta og hvar. „Við biðjum því fólk vinsamlegast um að hringja ekki í heilsugæslustöðina vegna þessa,“ segir í tilkynningu.