Mynd: EPA-EFE - SPUTNIK POOL
Athugið þessi frétt er meira en 2 mánaða gömul.
Pútín tryggir sjálfum sér friðhelgi til æviloka
Vladimír Pútín, Rússlandsforseti, undirritaði í gær löggjöf sem tryggir fyrrverandi Rússlandsforsetum ævilanga friðhelgi gagnvart ákæruvaldinu og sæti í öldungadeild rússneska þingsins frá þeim degi sem þeir láta af embætti allt til æviloka.
Fyrri löggjöf veitti fyrrverandi forsetum líka friðhelgi, en einungis vegna glæpa sem framdir voru í valdatíð þeirra sjálfra. Nýju lögin veita þeim ævilanga friðhelgi og kveða á um að ekki megi handtaka þá, leita á þeim eða heimilum þeirra, yfirheyra þá eða sækja til saka yfir höfuð, óháð því hvort glæpirnir voru framdir áður, eftir eða á meðan þeir voru í embætti. Jafnframt gerir löggjöfin það mun erfiðara en áður að upphefja friðhelgi fyrrverandi forseta.
Fylgir í kjölfar víðtækra breytinga á stjórnarskrá
Þessi nýja löggjöf fylgir fast á hæla gagngerra breytinga á stjórnarskrá og stjórnkerfi Rússlands, sem Pútín fékk samþykktar í þjóðaratkvæðagreiðlsu í sumar sem leið. Þær fela meðal annars í sér að honum er heimilt að bjóða sig fram til forseta tvisvar í viðbót og sitja á forsetastóli til ársins 2036 fái hann til þess stuðning kjósenda.
Án þessara breytinga hefði Pútín neyðst til að láta af embætti í lok þessa kjörtímabils, árið 2024, eftir samtals 24 ár á forsetastóli. Forsetinn, sem er 68 ára gamall, hefur ekkert látið uppi um það opinberlega hvort hann ætlar að bjóða sig fram fimmta sinni eftir fjögur ár.
