Athugið þessi frétt er meira en 2 ára gömul.

Varðskipsmenn sóttu innilyksa fólk og ketti

20.12.2020 - 10:26

Hamfarir · Innlent · Aurskriður · Austurland · Landhelgisgæslan · Seyðisfjörður · Skriðuföll · Varðskip

Mynd: Landhelgisgæslan - Ljósmynd

Skipverjar af varðskipinu Tý sóttu í gærkvöld fólk sem hafði flúið skriðuföllin í Seyðisfirði að Hánefsstöðum, sem eru utar í firðinum, og orðið innilyksa þar. Fólkið hafði með sér tvo ketti í búri og voru menn og dýr sótt á léttabáti varðskipsins að Hánefsstöðum og farið með þau að höfn í Seyðisfirði.

Lögregla sótti fólkið þangað og kom því á brott úr bænum, en hann er nú lokaður eftir að öll hús voru þar rýmd í fyrradag vegna aurskriðanna sem þá féllu.

Að sögn Ásgeirs Erlendssonar, upplýsingafulltrúa Landhelgisgæslunnar, hafði fólkið samband við lögreglu í gær og bað um að verða sótt.

Þórður Atli Eiríksson, einn þeirra sem varðskipsmenn sóttu í gærkvöld, sagði í viðtali við RÚV í gær að þau hefðu ekið eins langt burt frá fjöllunum og þau komust þegar stóra skriðan féll í fyrradag.

Sjá einnig: „Keyrðum eins langt í burtu frá fjöllunum“

Týr hélt úr höfn í Reykjavík í fyrradag og verður til taks á Seyðisfirði ef á þarf að halda. Þyrla Landhelgisgæslunnar, TF-GRO er nú á leiðinni þangað með fulla áhöfn og lækni og verður lögreglu og sérfræðingum á svæðinu til aðstoðar.