Athugið þessi frétt er meira en 2 mánaða gömul.

Austureyjagöngin í Færeyjum opnuð á morgun

19.12.2020 - 01:26
Mynd með færslu
Færeyjar að vetrarlagi. Mynd: CC0 - Pixabay
Austureyjagöngin í Færeyjum verða opnuð við mikla viðhöfn klukkan 11 á morgun laugardag. Jørgen Niclasen samgöngumálaráðherra klippir á borða og verður fyrstu til að aka í gegn en göngin verða opin fyrir almenna umferð frá hádegi á morgun.

Göngin eru ellefu kílómetra löng og liggja neðansjávar, þykja mikið mannvirki og tengja höfuðstaðinn Þórshöfn við Austurey á tveimur stöðum.

Búist er við að fjöldi fólks verði viðstaddur opnunina og aki í gegn því næstu tvær vikurnar verður það frítt, að því búnu ber að greiða veggjald. Það þykir hátt og hefur kveikt talsverðar deilur á samfélagsmiðlum.

Á morgun verður einnig frítt að aka um hin tvö neðansjávargöngin í Færeyjum og því hægur vandi fyrir flesta eyjaskeggja að vera viðstaddir opnun nýju gangnanna, auk þess sem sýnt verður beint frá opnunarathöfninni í sjónvarpi.

markusthth's picture
Markús Þ. Þórhallsson
Fréttastofa RÚV