Athugið þessi frétt er meira en 6 mánaða gömul.

Hafa þungar áhyggjur af ástandi vega á Vestfjörðum

18.12.2020 - 11:45
Mynd með færslu
 Mynd: aðsend mynd - RÚV
Bæjaryfirvöld í Vesturbyggð lýstu á fundi sínum í gær þungum áhyggjum sínum vegna ástands vega í sveitarfélaginu. Bundið slitlag á vegaköflum er horfið þrátt fyrir tilraunir til úrbóta í sumar. Bæjarráð segir aðeins tímaspursmál hvenær alvarlegt slys verður á þessum vegaköflum.

 

Vegkaflarnir liggja annars vegar um Mikladal og Tálknafjörð og hins vegar um Barðaströnd. Vegkaflarnir eru illa farnir og slitlag á stórum köflum er horfið, þrátt fyrir tilraunir Vegagerðarinnar til lagfæringa í sumar.

„Enda eru margir vegkaflar innan Vesturbyggðar 100 prósent  ónýtir vegir skv. úttekt Vegagerðarinnar frá júlí 2019. Að mati bæjarráðs er aðeins tímaspursmál hvenær alvarlegt slys verður á þessum vegarköflum og ítrekar mikilvægi þess að á meðan ekki er unnt að bregðast við ástandinu með viðunandi lagfæringum, að Vegagerðinni verði tryggð framlög til að gera nauðsynlegar lagfæringar og stórauka merkingar og upplýsingagjöf um alvarlegt ástand vegarkaflanna, til að draga úr hættu á að alvarlegt slys verði.“ segir í bókun bæjarráðs frá því í gær. 

Vegagerðin varar vegfarendur við að vegurinn sé slæmur á heimasíðu sinni í dag. 

Umtalsverðar slitlagsskemmdir eru á Bíldudalsvegi á Mikladal og Tálknafirði. Skemmdirnar eru mestar á Mikladal á um 4-5 km kafla og eru vegfarendur beðnir um að aka varlega þar sem aðstæður gætu verið varasamar á köflum. #færðin

Bæjarráð gaf út bókun í apríl þar sem Sigurður Ingi Jóhansson samgöngu og sveitarstjórnarráðherra var hvattur til að taka á þessu máli og ástandi vega á sunnanverðum Vestfjörðum af fullri alvöru og tryggja að brugðist verði við því sem fyrst. Bæjarráðið ítrekaði þá hvatningu sína í gær 

„Ljóst er miðað við ástand vega og stóraukna umferð á sunnanverðum Vestfjörðum, er nauðsynlegt að hefja sem allra fyrst undirbúning jarðgangagerðar á sunnanverðum Vestfjörðum, m.a. til að tryggja
öruggari samgöngur með jarðgöngum um Hálfdán (500 m.yfir sjávarmáli) og Mikladal (369 m. yfir sjávarmáli).“ segir í bókuninni frá því í gær. 

Jafnframt lýsir bæjarráð Vesturbyggðar miklum áhyggjum yfir ástandi Bíldudalsvegar í Arnarfirði sem er að hluta til horfinn.

„Í ljósi alls væri eðlilegt að flýta fyrirhuguðum framkvæmdum á því svæði svo hægt sé að koma í veg fyrir endurtekið tjón á veginum. Sú framkvæmd myndi létta á þungaflutningum sem fer um aðra vegi í sveitarfélaginu.“ segir í bókunum bæjarráðsins. 

 

 

Mynd tekin í Mikladal um seinustu helgi.
Mynd með færslu
 Mynd: aðsend mynd - RÚV
Vegurinn á Barðaströnd er illa farinn.
Mynd með færslu
 Mynd: aðsend mynd - RÚV