Írska tónlistarkonan Jess Smith sendir frá sér tónlist undir nafninu Biig Piig sem er yfirleitt frekar grúví eins og Austin Powers sagði á síðustu öld. Feels Right er engin undantekning á því og verður að finna á fyrstu plötu Biig Piig sem kemur út á næsta ári.
Nágrannar Hróa Hattar í Sleaford Mods eru ekkert að flækja hlutina í sinni tónlistarsköpun sem er undir sterkum áhrifum frá þýsku hljómsveitinni Trio sem söng DaDaDa fyrir fólk með axlapúða. Munurinn á þeim þýsku og Sleaford Mods er sennilega að þeir hafa ekki náð alheimshitti en sent frá sér nokkrar neglur og Mork n Mind er ein af þeim þar sem söngkonan Billy Nomates lyftir naumhyggjunni aðeins hærra.
Ela Minus er það heitasta sem hefur komið frá Kólimbíu síðan Pablo Escobar var upp á sitt besta að redda heimsbyggðinni innantómri hamingju og partýstuði í gamla daga. Lagið Dominique er að dúkka upp á árslistum hér og þar og er að finna á fyrstu plötu hennar, Acts of Rebellion, eins og lagið Megapunk sem sumir muna kannski eftir héðan fyrir nokkrum mánuðum.
Öllum að óvörum sendi dúettinn frábæri Arab Strap frá sér geggjað lag í september sem var það fyrsta sem heyrðist frá þeim í fimmtán ár og hét Turning Of Our Bones. Með söngul númer tvö, Compersion Pt.1, er ljóst að það kemur stór plata í mars sem hefur fengið nafnið As Days Get Dark. Sú er sem betur fer um eymd og volæði á jákvæðan og hressandi hátt eins og aðrar plötur Arab Strap.
Breska tónlistarkonan Arlo Parks hefur sent frá sér nokkra sjóðheita söngla á árinu og verður að teljast sem einn allra sterkasti nýliðinn í tónlistarlífinu á árinu. Aðdáendur hennar fá fyrstu plötu skvísunnar, Collapsed In Sunbeams, þann 29. janúar og lagið Caroline er á henni og er undir frekar greinilegum Radiohead-áhrifum, en hún hefur svo sem ekkert falið það að hún er mikill aðdáandi.
