Athugið þessi frétt er meira en mánaðargömul.

Aurskriða hrífur hús með sér á Seyðisfirði

18.12.2020 - 03:46
Húsið Breiðablik sem stóð við Austurveg á Seyðisfirði losnaði af grunni sínum og rann út á götu eftir aurskriður sem féllu um klukkan þrjú aðfaranótt 18. desember 2020.
 Mynd: Birgir Guðmundsson
Aurskriða sem féll úr Nautaklauf á Seyðisfirði hreif húsið Breiðablik við Austurveg af grunni sínum og bar það út á götu um klukkan þrjú í nótt.

Birgir Guðmundsson sem er búsettur á Seyðisfirði segist í samtali við fréttastofu hafa heyrt miklar drunur þegar skriðan féll úr gilinu. Hann telur að skriðan sé um metra djúp þar sem hún liggur yfir Austurveginn.

Birgir álítur að Breiðablik hafi borist með skriðunni allt að 30 til 40 metra og greinilegt sé að húsið sé mikið skemmt, gengið til og brotið. Enn er úrhellisrigning á Seyðisfirði og lögregla og björgunarsveitir að störfum, bæði Ísólfur frá Seyðisfirði og Jökull af héraði.