Athugið þessi frétt er meira en 5 mánaða gömul.

Segja þyrluleysið spila með líf sjómanna

Mynd með færslu
 Mynd: Guðmundur Valdimarsson - Landhelgisgæslan
Eina tiltæka þyrla Landhelgisgæslunnar bilaði í fyrradag og er engin þyrla Landhelgsigæslunnar útkallshæf. Sjómannafélögin hafa sent frá sér yfirlýsingu vegna þyrluleysisins og segja það ámælisvert að spilað sé með líf og heilsu sjómanna. Þyrlurnar séu sjúkrabílar sjómanna, öryggistæki sem eigi alltaf að vera til staðar.

Formenn félaganna hvetja Landhelgisgæsluna og dómsmálaráðherra til að bæt verklag til þess að þyrluleysið komi ekki upp aftur. 

Uppfært 16:59

Enn er beðið eftir að varahlutur berist til landsins. Ásgeir Erlendsson, upplýsingafulltrúi Landhelgisgæslunnar, sagði bilunina í TF-GRO smávægilega en aukahlutinn ekki hafa borist til landsins í dag svo að ekki má búast við að þyrlan verði útkallshæf fyrr en annað kvöld.

Vanalega hefur Landhelgisgæslan tvær þyrlur tiltækar. Vegna verkfalls flugvirkja, sem Alþingi stöðvaði með lagasetningu 27. nóvember, tafðist reglubundin eftirlitsskoðun á hinni þyrlunni, TF-EIR. Sú þyrla verður útkallshæf í næstu viku.

Undir yfirlýsinguna skrifa f.h VM félag vélstjóra og málmtæknimanna: Guðmundur Helgi Þórarinsson formaður, f.h Sjómannasamband Íslands: Valmundur Valmundarson formaður, f.h Félag Skipstjórnarmanna: Árni Bjarnason formaður, f.h Sjómannafélags Íslands: Bergur Þorkelsson formaður f.h Sjómanna og vélstjórafélags Grindavíkur: Einar Hannes Harðarson formaður.

Yfirlýsing 

Eina tiltæka þyrla Landhelgisgæslunnar bilaði í fyrradag og þess vegna er engin þyrla útkallshæf. Beðið er eftir að varahlutur berist til landsins.

Samkvæmt Landhelgisgæslunni á þyrlan að vera klár í kvöld, þá hefur Landhelgisgæslan verið þyrlulaus á þriðja sólarhring.

Þyrlur Landhelgisgæslunnar eru mikið öryggistæki fyrir sjómenn, það er ámælisvert að þetta aðal öryggistæki sjómanna skuli ekki alltaf vera til staðar, þyrlur Landhelgisgæslunnar eru sjúkrabílar sjómanna.

Við viljum ekki hugsa þá hugsun til enda að ef sjóslys kemur upp og þyrlur Landhelgisgæslunnar eru ekki til taks. Það eru mannslíf í húfi og það á aldrei að spila með líf og heilsu fólks eins og núna er gert.

Við hvetjum yfirmenn Landhelgisgæsluna til þess að bæta verklag og ráðherra málaflokksins að sjá til þess að þetta gerist ekki aftur.

 

Valgerður Árnadóttir
Fréttastofa RÚV