Athugið þessi frétt er meira en 9 mánaða gömul.

Hafa greint um fjögur þúsund sýni úr Tröllaskagahólfi

Mynd með færslu
 Mynd: Eggert Þór Jónsson - RÚV
Matvælastofnun hefur tekið 3.947 sýni úr Tröllaskagahólfi frá því að fyrsta tilfelli riðu kom upp í hólfinu um miðjan október. Þannig hafa 170 sýni verið tekin úr kindum sem felldar voru í tengslum við flutninga frá sýktum búum, 1.449 sýni eru úr sláturfé og 2.328 sýni úr fé sem skorið var niður. Frá því að fyrsta tilfellið var greint hefur riða greinst á fjórum öðrum bæjum.

Settu sláturfé í forgang

Eftir að riðan kom upp var greining á sláturfé úr Tröllaskagahólfi sett í forgang. Henni er nú lokið og nú hefst greining sýna úr fé sem skorið var niður á sýktum bæjum til að kanna útbreiðslu innan hjarðanna.

Næmni prófana 67%

Í tilkynningu frá MAST segir að þó riða hafi ekki greinst  á fleiri stöðum verði að taka þær niðurstöður með fyrirvara því næmi prófsins er 67% og þannig ekki hægt að útiloka frekari útbreiðslu. Sýnin voru send til greiningar hjá Tilraunastöð Háskóla Íslands á Keldum. 

Tíminn mun leiða útbreiðslu í ljós

„Matvælastofnun ítrekar að þrátt fyrir að ekki séu vísbendingar um frekara smit innan hólfsins þá er ekki hægt að útiloka það. Meðgöngutími riðu er 2-5 ár og verður tíminn að leiða í ljós hvort riða hefur dreift sér frekar. Rakning fjárflutninga á svæðinu heldur áfram og greining sýna úr kindum sem hafa verið fluttar milli bæja er í forgangi. Tilkynnt verður um smit þegar og ef það greinist,“ segir í tilkynningu. 

Mynd með færslu
 Mynd: Eggert Þór Jónsson - RÚV
Tilraunastöð Háskóla Íslands á Keldum