Athugið þessi frétt er meira en 4 mánaða gömul.

Guðmundur hefur áhyggjur af stuttum undirbúningi

Mynd með færslu
 Mynd: Mummi Lú - RÚV

Guðmundur hefur áhyggjur af stuttum undirbúningi

15.12.2020 - 12:26
Guðmundur Guðmundsson, sem fyrr í dag valdi leikmannahópinn fyrir HM í handbolta í janúar, hefur áhyggjur af stuttum undirbúningi. Ekki er komin undanþága fyrir liðið að æfa milli jóla og nýárs. Þá flækist flókið ferðalag fyrir.

Eins og staðan er núna hjá íslenska liðinu má það hefja æfingar 2. janúar. Þá væri hægt að æfa einu sinni, svo tvisvar 3. janúar en eftir það heldur liðið til Portúgal til að leika við þarlenda í undankeppni EM 2022. 

„Það er með ólíkindum að það sé settir svona erfiðir leikir fyrir HM en þetta eru auðvitað ekki einfaldir leikir við Portúgal,“ sagði Guðmundur á fjarfundi með blaðamönnum í dag þar sem hópurinn var kynntur.

Guðmundur hefur sérstakar áhyggjur af ferðalaginu frá Portúgal og aftur til Íslands, þar sem sömu lið mætast aftur í undankeppni EM 2022 þann 10. janúar.

 

Við höfum sérstakar áhyggjur af ferðalagi okkar aftur til baka til Íslands frá Portúgal þann 5. janúar. Það ferðalag gæti reynst okkur mjög erfitt að komast aftur til Íslands. Möguleiki er á því að við þyrftum að gista og þar með erum við búnir að tapa mjög mikilvægum degi í undirbúningi, bæði fyrir seinni leikinn við Portúgal og samhliða fyrir HM,“ sagði Guðmundur.

Vonast til að fá undanþágu

Í ljósi þessa stífa plans í byrjun janúar vonast Guðmundur til að fá undanþágu sóttvarnayfirvalda til að hefja æfingar milli jóla og nýárs. 

„Skrif­stofa HSÍ hef­ur leitað leiða til að fá und­anþágu til að æfa á milli hátíðanna. Það væri nán­ast ómet­an­legt fyr­ir okk­ur. Við ger­um það besta úr stöðunni. Von mín er að við fáum und­anþágu til að æfa á milli jóla og ný­árs en samt þannig að leik­menn fái að njóta sam­vista með fjöl­skyld­um sín­um um ára­mót­in. Maður veit aldrei hvað morg­undag­ur­inn ber í skauti sér og það hef­ur maður lært í þessu Covid. Maður læt­ur ekk­ert koma sé á óvart leng­ur,“ sagði Guðmundur.

Valið á liðinu ber merki Covid-19 tíma

21 leikmaður var valinn í liðið fyrir þessi tvö verkefni og Guðmundur reiknar með að 20 þeirra fari með á HM. Það er fjórum fleiri en venjulega. Aðeins má skrá 16 til leiks í upphafi móts, hinir verða til taks ef gera þarf breytingar.

Þá reyndi Guðmundur að velja sem flesta leikmenn sem leyst geti fleiri en eina stöðu í liðinu, komi upp meiðsli.

„Það var gríðarleg púslu­spil að koma sam­an liðinu. Marg­ir þætt­ir spila þar inn í. Til að mynda hafa hand­knatt­leiks­menn á Íslandi ekki haft kost á því að æfa í lang­an tíma. Að ein­hverju leyti hef­ur það áhrif á valið. Und­ir­bún­ing­ur­inn er stutt­ur og erfitt gæti orðið að gera breyt­ing­ar á hópn­um á HM út af fjar­lægð við Egypta­land. Við eig­um von á að fara með 20 leik­menn til Egypta­lands. Við vild­um hafa eins mik­inn fjöl­breyti­leika og hægt er út af óviss­unni tengdri veirunni,“ sagði Guðmundur.

„Sérstaklega ánægjulegt að ræða ungu mennina“

Guðmundur tiltók sérstaklega ungu leikmenn liðsins á fundi morgunsins. Margir þeirra hafa tekið stór skref á sínum ferli á liðnu ári, fært sig í sterkari lið og deildir og staðið undir væntingum á nýjum stöðum.

„Það er sér­stak­lega ánægju­legt fyr­ir mig að ræða þetta. Það má segja að ákveðin bylt­ing hafi orðið frá ár­inu 2018 þegar ég tók við. Þá stóðum við frammi fyr­ir því að byggja upp nýtt lið. Við gerðum það og nú eru marg­ir þeirra að fara á sitt þriðja stór­mót.“

„Þeir hafa líka tekið skref inn í at­vinnu­mennsku og bætt sig stór­kost­lega þar. Þess vegna er eig­in­lega hægt að tala um bylt­ingu því árið 2018 voru fjöl­marg­ir leik­menn hér heima. Alltaf fara fleiri og fleiri er­lend­is sem ná að bæta sig og styrkja sig. Auðvitað er það ánægju­leg þróun fyr­ir mig sem landsliðsþjálf­ara. Það eru ekki mörg landslið sem hafa farið svo mark­visst í end­ur­nýj­un eins og ís­lenska landsliðið.“

 

 

Tengdar fréttir

Handbolti

Guðmundur valdi hópinn fyrir HM - Alexander er með