Metamfetamín. Mynd úr safni. Mynd: Wikipedia
Athugið þessi frétt er meira en 6 mánaða gömul.
Malasíska strandgæslan fann metmagn af metamfetamíni
Strandgæsla Malasíu lagði í liðinni viku hald á rúmlega tvö tonn af metamfetamíni í bát sem eltur var uppi undan norðurströnd landsins. Er þetta stærsti fíkniefnafundur sem liðsmenn strandgæslunnar hafa gert frá því að hún var sett á laggirnar fyrir 15 árum. Efnið í lest bátsins var í 130 sekkjum sem merktir voru sem kínverskt te. Söluvirði þess er metið á sem svarar 3,3 milljörðum króna.
Haft er eftir sérfræðingum strandgæslunnar að efnið hafi að líkindum komið frá hinum svokallaða gullna þríhyrningi á landamærum Mjanmar, Laos og Taílands, og átt að fara til einhverra nágrannaríkja Malasíu, þar sem hærra verð fæst fyrir það.
Einn maður á þrítugsaldri var um borð í smyglbátnum og var hann handtekinn. Malasísk lög heimila dauðarefsingu fyrir alvarleg fíkniefnabrot.
