Athugið þessi frétt er meira en 5 mánaða gömul.

Fleiri umsækjendur um alþjóðlega vernd fá þjónustu

Mynd með færslu
 Mynd: Þór Ægisson - RÚV
Umsækjendum um alþjóðlega vernd sem fá þjónustu í Reykjavík verður fjölgað um allt að áttatíu. Borgarráð veitti í gær sviðsstjóra velferðarsviðs Reykjavíkurborgar heimild til að endurnýja þjónustusamning við Útlendingastofnun, þannig að allt að 300 umsækjendur um alþjóðlega vernd fái þjónustu í borginni. Með breytingunni bregst Reykjavíkurborg við beiðni Útlendingastofnunar, sem barst í október síðastliðnum.

Í samningi velferðarsviðs Reykjavíkurborgar við Útlendingastofnun felst að borgin útvegi umsækjendum um alþjóðlega vernd húsnæði, fæðis- og framfærslueyri og skólavist fyrir börn, ásamt ýmissi annarri þjónustu á meðan umsókn þeirra um alþjóðlega vernd er til meðferðar hjá stjórnvöldum. Þjónustan getur til dæmis verið aðstoð vegna heilbrigðistengdrar þjónustu, túlkaþjónustu og ýmiss konar ráðgjöf. 

Í tilkynningu frá Reykjavíkurborg segir að umsækjendum um alþjóðlega vernd hafi fjölgað hratt í Reykjavík á síðustu árum. Árið 2014 hafi verið gerður samningur við Útlendingastofnun þar sem gert hafi verið ráð fyrir að 50 umsækjendur fengju þjónustu í Reykjavík og í apríl árið 2019 hafi svo verið gerður samningur um þjónustu við 220 manns. 

Stuðningur við umsækjendur sé margs konar: „Samhliða þessari miklu fjölgun hefur velferðarsvið aukið til muna þjónustu við umsækjendur um alþjóðlega vernd sem er fólgin í margþættri aðstoð við athafnir daglegs lífs, bæði inni á heimilum fólks og í samskiptum við aðrar stofnanir. Stuðningurinn kemur frá þverfaglegu teymi sem starfar á velferðarsviði þar sem starfsfólkið er með fjölbreytta menntun, mismunandi bakgrunn og reynslu. Markmið teymisins er að veita umsækjendum sem besta þjónustu meðan á umsóknarferli stendur, stuðla að vellíðan þeirra, valdefla þá og styrkja.“

Þá hefur borgarráð einnig veitt sviðsstjóra velferðarsviðs umboð til að ganga til samninga við félagsmálaráðuneytið um tilraunaverkefni um samræmda móttöku flóttamanna.