Athugið þessi frétt er meira en 5 mánaða gömul.

280 undirskriftir gegn fiskeldi í Seyðisfirði

08.12.2020 - 16:47
Mynd með færslu
 Mynd: RÚV - Rúnar Snær Reynisson
Andstæðingar fiskeldis í Seyðisfirði afhentu bæjarstjóra Múlaþings undirskriftir 280 Seyðfirðinga í dag. Þeir mótmæla eldinu vegna sjónrænna áhrifa og krefjast samráðs við íbúa.

Björn Ingimarsson, bæjarstjóri, sagði að mótmælin og listinn yrðu vistuð með öðrum gögnum málsins. Hann ætti ekki von á öðru en að sveitarstjórn tæki undir ályktum heimastjórnar á Seyðisfirði frá 30. nóvember.

Þar krafðist heimastjórnin þess að Fiskeldi Austfjarða hefji strax samtal við sveitarfélagið og íbúa Seyðisfjarðar og kynni fyrirhugað laxeldi í Seyðisfirði. Heimastjórnin vill einnig að passað verði upp á náttúru Seyðisfjarðar og glæsilega innsiglingu um fjörðinn.

Þá er fyrirhugaðri staðsetningu sjókvíaeldisins við Háubakka mótmælt, en það svæði sé veigamikill hluti af athafnasvæði hafnarinnar og meðal annars á stað þar sem skemmtiferðaskip þurfi að athafna sig.