Frumgerð sjálfkeyrandi rafbíls frá Argo AI. Mynd: AP
Athugið þessi frétt er meira en 5 mánaða gömul.
Sjálfkeyrandi bílar á markað innan áratugar
Forstjóri þýska bílaframleiðandans Volkswagen segir að sjálfkeyrandi bílar verði komnir á markað á næsta áratug.
Þetta sagði Herbert Diess, forstjóri fyrirtækisins, í viðtali við þýskt tímarit. Volkswagen er stærsti bílaframleiðandi heims hvað fjölda seldra bíla varðar.
Hann segir miklar framfarir orðið hafa í þróun tölvukubba sem nauðsynlegir eru í sjálfkeyrandi bíla og árangur sem náðst hafi í gervigreind geri það að verkum að þeir komi á göturnar fyrr en síðar.
„Fyrirsjáanlegt er að þessi kerfi verði fær um að ná tökum á flóknustu aðstæðum sem sjálfkeyrandi bílar þurfa að takast á við,“ sagði Diess. Hann tók við stjórn fyrirtækisins árið 2015 eftir útblásturshneykslið svokallað þar sem í ljós kom að Volkswagen hafði sagt ósatt um mengun dísilvéla sem það framleiddi. Diess hefur í starfstíð sinni lagt mikla áherslu á þróun rafknúinna bíla.
Mynd: Alexander Migl - Wikipedia
Herbert Diess.
