Enn næst ekki samkomulag um TikTok

Síðustu forvöð voru á miðnætti föstudags fyrir ByteDance, sem á og rekur forritið, að uppfylla kröfu um að koma hlutafé þess í bandarískar hendur.

Samningafundir forsvarsfólks TikTok og stjórnvalda halda þó áfram þrátt fyrir að komið sé fram yfir tímamörk.

Bandarískir notendur forritsins geta því haldið áfram að nota það við að deila stuttum myndskeiðum sín á milli enn um sinn.

Bandarísk stjórnvöld með forsetann og varaforsetann í broddi fylkingar hafa sagt forritið ógn við þjóðaröryggi enda noti kínversk yfirvöld það til njósnastarfsemi. Það hafa fulltrúar fyrirtækins ætíð aftekið með öllu.