Athugið þessi frétt er meira en 11 mánaða gömul.

Veður tefur póstflutninga fyrir austan og norðan

04.12.2020 - 15:08
Mynd með færslu
 Mynd: Birgir Þór Harðarson - RÚV
Tafir á flutningum pósts á Austur- og Norðurleiðum hafa orðið sökum óveður sem gengið hefur yfir landið. Af þessum sökum verða nokkur pósthús fyrir austan og norðan opin á laugardag.

Þetta kemur fram í tilkynningu frá Póstinum.

„Eins og staðan er núna er veðrið ekki að spila með okkur en við leggjum allt kapp á að koma sendingum áfram á áfangastaði sem allra fyrst. Það er allra hagur að sendingar komist til viðtakanda við fyrsta tækifæri. En á sama tíma verðum við að sjálfsögðu að huga að öryggi starfsmanna og við förum ekki af stað nema aðstæður séu öruggar. Við stefnum á að fara í kvöld þannig að allt ætti að vera komið í eðlilegt horf eftir helgi,“ segir Hörður Jónsson, framkvæmdastjóri rekstrarsviðs Póstsins.

Pósturinn gerir ráð fyrir því að póstflutningar fari fram í kvöld og um helgina. Einnig verður almennt keyrt út á öllum stærri stöðum á landinu þar sem heimkeyrsla er í boði um helgina.

Efirfarandi pósthús verða opin um helgina vegna þessara tafa þar sem viðskiptavinir geta nálgast sendingar og póstlagt.

Austurland

Pósthús á Egilsstöðum, Reyðarfirði, Neskaupstað og Höfn verða opin laugardag frá 10:00 til 14:00.

Pósthús á Eskifirði, Fáskrúðsfirði og Djúpavogi verða opin laugardag frá 11:00 til 15:00.

Norðurland

Pósthús á Dalvík, Húsavík og Siglufirði verða opin á laugardag frá frá 10:00 til 12:00.

thorvardurp's picture
Þorvarður Pálsson
Fréttastofa RÚV