Athugið þessi frétt er meira en 3 mánaða gömul.

Vinnutími starfsmanna ríkis og bæja styttist um áramót

Mynd: BSRB / BSRB
Styttri vinnuvika felur í sér aukin lífsgæði starfsfólks og stuðlar að hamingjusamara samfélagi segir á vef BSRB. Í samningum við ríki og sveitarfélög í vor var samið um styttingu vinnuvikunnar í allt að 36 tíma hjá dagvinnufólki en allt að 32 hjá vaktavinnufólki. Vinnan við útfærslu fyrir dagvinnufólk er langt komin, enda á hún að taka gildi um áramótin en í vor hjá vaktavinnufólki. Stytting vinnutímans er sögulegur áfangi segir Sonja Ýr Þorbergsdóttir, formaður BSRB. 

Reykjavíkurborg og nokkrar stofnanir hjá ríkinu hafa þegar gert tilraun með styttingu og Sonja segir það hafi í raun komið á óvart hve jákvæðar niðurstöðurnar eru.  Það hafi reynst flestum auðveldara að skipuleggja starfsemina upp á nýtt en búist var við, starfsánægja hafi aukist og eins hafi áhrif á fjölskyldulíf og tilveru verið meiri en þátttakendur héldu í upphafi. Því styttri sem dagurinn varð því ánægðara varð fólk. Lagt er upp með að styttingin á hinum virku tímum í 36 verði án kostnaðarauka fyrir launagreiðanda og kjaraskerðingar fyrir launamann. Sonja segir að það hafi reynst tímafrekara að finna leiðir til að útfæra þetta á stöðum eins og leikskólum sem eru opnir í ákveðinn tíma. Hún segir að í vinnunni nú sé ríkið komið hvað lengst. 

Ekki þannig að menn geti aldrei um frjálst höfuð strokið

Til að ná fram styttingu í 36 tíma vinnuviku gefur starfsfólk eftir forræði á matar og kaffitímum svo þeir verði sveigjanlegir. Það þýðir þó ekki að allir hlaupi þindarlaust og fólk geti hvorki fengið sér mat né kaffi á vinnudeginum. Sonja segir að hvorki hjá samtökum launafólks né launagreiðenda sé það markmiðið. 

13 mínútur á dag ef ekki næst samkomulag

Að undangenginni vinnu vinnutímanefndar á hverjum stað, samtal og samráð við starfsmenn og stjórnendur á að leggja fram tillögur um útfærslu styttingar á hverjum stað og greiða atkvæði um tillöguna.
Séu þær samþykktar taka þær gildi um áramótin.

Ef starfsfólk nær ekki samkomulagi styttist vinnutími um 13 mínútur á dag eða 65 mínútur á viku um áramótin.