Athugið þessi frétt er meira en 3 mánaða gömul.

Írar slaka verulega á takmörkunum en Belgar pínulítið

28.11.2020 - 03:40
epa08377240 A pedestrian passes by a closed pub in Dublin City, Ireland, 22 April 2020. According to the Irish Finance Minister GDP will fall by 10 percent and unemplyment peak at 22 percent  due to the affects of the Covid-19 pandemic.  EPA-EFE/Aidan Crawley
Írskar krár hafa verið lokaðar um nokkurra vikna skeið vegna COVID-19 en á því verður breyting í næstu viku.  Mynd: epa
Stjórnvöld á Írlandi og í Belgíu hafa boðað tilslakanir á sóttvarnareglum. Þær eru umtalsverðar á Írlandi, en öllu minni í Belgíu.

Verslanir, veitingastaðir og krár verða opnaðar á Írlandi

Á Írlandi munu á milli 100 - 150.000 manns geta snúið aftur til vinnu í næstu viku, þar sem heimilt verður að opna allar verslanir, veitingastaði og líkamsræktarstöðvar á ný, og einnig allar þær krár sem bjóða upp á mat. Leo Varadkar, viðskipta- og aðstoðarforsætisráðherra, tilkynnti þetta í gærkvöld.

Nær 150.000 manns hafa bæst í hóp þeirra sem þiggja hlutabætur úr ríkissjóði síðan byrjað var að herða sóttvarnaraðgerðir í september, þar af um 100.000 eftir að gripið var til víðtækra lokana 21. október.

Einbúar mega fá tvö í heimsókn um jólin

Í Belgíu fara stjórnvöld sér öllu hægar við að slaka á sóttvarnaaðgerðum, og þær litlu tilslakanir sem boðaðar eru gilda einungis yfir blájólin. Verslanir sem ekki selja nauðsynjavörur, öldurhús, veitinga- og samkomustaðir af öllu tagi verða áfram lokuð og strangar fjöldatakmarkanir í gildi.

Í tilkynningu stjórnvalda frá því í gær segir að fólki sem býr eitt verði heimilt að fá tvær manneskjur í heimsókn samtímis dagana 24. og 25. desember, í stað einnar nú. Þessar tvær manneskjur verða þó að vera úr hópi allra nánustu vina eða ættingja viðkomandi. Samkvæmt gildandi reglum er fólki einungis heimilt að fá einn gest inn á heimili sitt í einu. Það á einnig við þar sem fleiri eru í heimili, og á því verður engin breyting um jólin.