Athugið þessi frétt er meira en 7 mánaða gömul.

Norlandair semur um aukið flug til Grænlands

24.11.2020 - 13:57
Mynd með færslu
 Mynd: Norlandair
Norlandair hefur skrifað undir samning við grænlensku heimastjórnina um flug frá Íslandi til Scoresbysunds tvisvar í viku. Flogið verður bæði frá Akureyri og Reykjavík. Samningurinn er til 6 ára og er framlengjanlegur um fjögur ár.

Norlandair hefur í áratugi flogið milli Akureyrar og Grænlands og þjónustað þar íbúa á austurströninni. Þá hefur félagið flogið fyrir alþjóðlegar rannsóknastofnanir og erlend ríki, m.a. danska herinn.

Flogið frá Akureyri og Reykjavík

Norlandair hefur haldið uppi áætlun tvisvar í viku undanfarin ár frá Akureyri. Flug frá Reykjavík bætist nú við, auk þess sem í samningnum er opnað á flug milli staða á Grænlandi, að því er kemur fram í tilkynningu frá félaginu.

Nota þrjár tegundir flugvéla

„Samstarf Norlandair og heimastjórnarinnar á sér djúpar rætur og hefur ávallt verið farsælt,“ segir Friðrik Adolfsson,  framkvæmdastjóri Norlandair. „Við munum sinna þessu flugi með DHC-6 Twin Otter og B200 King Air, ásamt DASH-8 flugvél sem til stendur að innleiða. Breidd flugvélaflotans og sérhæfð þjálfun flugmanna gerir okkur kleift að fljúga við mjög krefjandi aðstæður og þjónusta þetta harðbýla svæði á öruggan hátt“.