Mynd: Sighvatur Jónsson - RÚV
Athugið þessi frétt er meira en mánaðargömul.
Með öllu óviðunandi og ógnar íbúum Vestmannaeyja
Almannavarnanefnd Vestmannaeyja hefur lýst yfir alvarlegum áhyggjum af þeirri stöðu sem uppi er varðandi þyrlur Landhelgisgæslunnar vegna verkfalls flugvirkja. Á morgun verður engin þyrla til taks hjá Gæslunni í að minnsta kosti tvo daga vegna viðhalds.
„Þetta er með öllu óviðunandi og getur ógnað öryggi íbúa í Vestmannaeyjum og sjófarenda ekki síst í því ljósi að veðurspá fyrir næstu daga er slæm og við búið að samgöngur milli lands og Eyja geti raskast verulega af þeim sökum,“sagði Almannavarnanefnd Vestmannaeyja í yfirlýsingu á Facebook síðu lögreglunnar í Vestmannaeyjum í dag.
Nefndin skorar á stjórnvöld að gera viðeigandi ráðstafanir til að tryggja að þyrluþjónusta Landhelgisgæslunnar og neyðarþjónusta á sjó og landi verði með viðunandi hætti.
Áslaug Arna Sigurbjörnsdóttir, dómsmálaráðherra, fer á fund forstjóra Landhelgisgæslunnar, Georgs Kr. Lárussonar, í dag þar sem hún metur valkosti Landhelgisgæslunnar og greinir stöðuna betur með forstjóra.
Hún sagði stöðuna hafa verið rædda lengi á ríkiststjórnarfundi í dag og að hún væri litin alvarlegum augum.
