Athugið þessi frétt er meira en 5 mánaða gömul.

Ísland fær Moderna-bóluefnið eftir kaup ESB

24.11.2020 - 17:04
epa08838949 European Commission President Ursula von der Leyen delivers a statement at EU headquarters in Brussels, Belgium, 24 November 2020. The European Commission announced on Tuesday that it has approved a new contract to secure a COVID-19 vaccine from Moderna.  EPA-EFE/Olivier Matthys / POOL POOL PHOTO
 Mynd: EPA-EFE - AP POOL
Ísland fær bóluefni bandaríska lyfjaframleiðendans Moderna. Ursula von der Leyen, forseti framkvæmdaastjórnar Evrópusambandsins, staðfesti í dag að á morgun yrði gengið frá kaupum á allt að 160 milljón skömmtum. Þar með á Evrópusambandið nærri tvo milljarða skammta af bóluefni.

Reuters greinir frá þessu á vef sínum.

Von der Leyen sagði í yfirlýsingu að bóluefni væri lífsnauðsynlegt til að binda endi á faraldurinn. Lyfjastofnun Evrópu ætti eftir að gefa grænt ljós og aðeins þau bóluefni sem væri örugg og veittu vörn við COVID-19 yrði dreift.  Gagnsæi væri algjört lykilatriði. Hún sagði jafnframt að nú væru margir sem óttuðust að geta ekki hitt ástvini sína um jólin og því væru fréttir dagsins sérstaklega ánægjulegar. 

Samkvæmt samkomulagi er Íslandi tryggður sami aðgangur að bóluefnum sem Evrópusambandið semur um og aðildarríkjum sambandsins. Þegar var búið að tryggja aðgengi Íslands að fjórum bóluefnum; Pfizer, Janssen Pharmaceutica, AstraZeneca og Sanofi og GSK.

Ekki er vitað hvenær bóluefni við COVID-19 kemur til landsins né þá hvenær verður hægt að hefja bólusetningar. Undirbúningur er í fullum gangi hjá sóttvarnalækni sem hefur sagt að ef það komi lítið þurfi að forgangsraða en ef það komið mikið verði hægt að bólusetja hratt.

Bæði bóluefni Pfizer og Moderna hafa birt fyrstu niðurstöður úr rannsóknum sínum sem benda til þess að virkni þeirra sé 95 prósent.   Virkni bóluefnis AstraZeneca sem er unnið í samstarfi við Oxford-háskóla getur verið 90 prósent ef það er gefið á ákveðin hátt. Þórólfur Guðnason, sóttvarnalæknir, sagði í samtali við fréttastofu í dag að beðið væri eftir frekari upplýsingum frá fyrirtækinu.

 

freyrgigja's picture
Freyr Gígja Gunnarsson
Fréttastofa RÚV