Athugið þessi frétt er meira en 11 mánaða gömul.

60 ótímabær dauðsföll á ári af völdum svifryksmengunar

24.11.2020 - 04:39
Mynd með færslu
 Mynd: Grímur Sigurðsson - RÚV
Umhverfisstofnun Evrópu áætlar að sextíu ótímabær dauðsföll á Íslandi megi rekja til útblástursmengunar. Þau séu öll vegna fíns svifryks en áhrif köfnunarefnisdíoxíðs og osóns á jörðu niðri séu hverfandi.

Fréttablaðið fjallar um þetta í dag og greinir frá að markmið umhverfisráðherra sé að ná slíkum dauðsföllum niður fyrir fimm árið 2029. Það verði meðal annars gert með aukinni upplýsingagjöf um loftgæði á hverjum tíma og rykbindingu gatna.

Fram kemur að Ísland sé meðal þeirra fjögurra landa sem séu undir strangari viðmiðunargildum Evrópu, hin séu Finnland, Eistland og Írland. Umhverfisstofnun Evrópu gerir ráð fyrir að 417 þúsund látist ótímabært vegna mengunar í 41 landi. Þó hafi tekist að fækka dauðsföllum af hennar völdum um 60 þúsund á tíu árum.