Mynd: BBC - Skjáskot
Athugið þessi frétt er meira en 4 mánaða gömul.
Rannsaka hvort Díana hafi verið ginnt í viðtal
Breska ríkisútvarpið BBC hyggst hefja rannsókn á því hvort Díana heitin, prinsessa af Wales, hafi verið ginnt til að koma í frægt viðtal við fréttamanninn Martin Bashir í fréttaskýringaþættinum Panorama árið 1995. Þetta var ákveðið í kjölfar fullyrðinga Charles Spencer jarls, bróður Díönu, um að Bashir hefði lagt fram fölsuð gögn sem áttu að sýna að háttsettir starfsmenn bresku hirðarinnar hefðu fengið greitt fyrir að njósna um Díönu og hefði þannig unnið hana á sitt band.
Viðtalið vakti gríðarlega athygli þegar það var sýnt og um 23 milljónir manna víða um heim horfðu á það. Þar talaði prinsessan á afar opinskáan hátt um hjónaband sitt við Karl Bretaprins og líðan sína. Setningin „Við vorum þrjú í þessu hjónabandi,“ sem Díana lét falla í viðtalinu eru ein frægustu ummæli hennar, en þar átti hún við samband Karls við Camillu Parker-Bowles, sem nú er eiginkona hans.
Í viðtalinu sagði Díana einnig, en þau Karl voru þá skilin, að hún yrði aldrei drotting Bretlands. „En ég myndi vilja verða drottning í hjörtum fólks,“ sagði hún.
Í frétt BBC er haft eftir Spencer jarli að ef það hefði ekki verið fyrir þessi gögn, þá hefði hann ekki lagt það til við systur sína að hún færi í viðtalið. Hann sakar BBC um að taka þetta ekki alvarlega og segir breska ríkisútvarpið skulda honum, almenningi og minningu Díönu afsökunarbeiðni. Nú hefur BBC fengið Dyson lávarð, hæstaréttardómara á eftirlaunum, til að leiða rannsókn á málinu.
Vilhjálmur prins, sonur Díönu og Karls, segir í yfirlýsingu sem hann sendi frá sér í dag að hann fagni rannsókninni.
