Athugið þessi frétt er meira en 7 mánaða gömul.

Hljóðleikhús í Þjóðleikhúsinu fram að jólum

Mynd með færslu
 Mynd: Þjóðleikhúsið

Hljóðleikhús í Þjóðleikhúsinu fram að jólum

18.11.2020 - 16:38

Höfundar

Vegna samkomutakmarkana í heimsfaraldri kórónuveirunnar eru leikhús landsins að mestu lokuð og almenningi gefst ekki kostur á að njóta sköpunar leikara og leikstjóra á stóra sviðinu. Þjóðleikhúsið hefur brugðið á það ráð að framleiða hljóðleikhús á aðventunni og senda það beint út á vefnum.

Á hverjum fimmtudegi fram að jólum sendir Hljóðleikhús Þjóðleikhússins út íslenskt leikverk. Þetta eru eldri verk sem lítið eða aldrei hafa verið leikin, og menningarsögulega merkileg verk.

Fyrsta útsending hljóðleikhússins verður á morgun þegar valin brot úr Skugga-Sveini verða flutt. Útsendingar hljóðleikhússins verður að finna á vef Þjóðleikhússins.

Í myndbrotinu sem sést hér að ofan má sjá æfingu hljóðleikhúss Þjóðleikhússins. Ólafía Hrönn Jónsdóttir er þarna í hlutverki Skugga Sveins í samnefndu leikriti Matthíasar Jochumsonar í leikstjórn Benedikts Erlingssonar. Síðar heyrðist í Erni Árnasyni í sínu hlutverki.

Sýningarnar verða fimm. Hér að neðan er dagskrárkynning Hljóðleikhússins.

19. nóvember – Valin brot úr Skuggasveini, eftir Matthías Jochumsson í leikstjórn Benedikts Erlingssonar.
Skugga-Sveinn eftir þjóðskáldið Matthías Jochumsson var fyrst sett á svið í Reykjavík árið 1862 og varla hefur nokkurt íslenskt leikrit verið leikið oftar hér á landi. Verkið er alþýðlegur gamanleikur með söngvum og efnið hjátrú, ótti við hið ókunna, ást og hatur. Benedikt Erlingsson gerir hér eigin atlögu að verkinu og Karl Olgeir Olgeirsson sér um tónlistarstjórn.  Skugga-Sveinn eftir þjóðskáldið Matthías Jochumsson var fyrst sett á svið í Reykjavík árið 1862 og varla hefur nokkurt íslenskt leikrit verið leikið oftar hér á landi. Verkið er alþýðlegur gamanleikur með söngvum og efnið hjátrú, ótti við hið ókunna, ást og hatur. Benedikt Erlingsson gerir hér eigin atlögu að verkinu og Karl Olgeir Olgeirsson sér um tónlistarstjórn. Ólafía Hrönn Jónsdóttir mun leika Skugga Svein og Hilmir Snær mun leika Grasa Guddu. Þess má geta að í undirbúningi er sviðsuppsetning á verkinu á næsta leikári í uppsetningu Leikfélags Akureyrar í samstarfi við Þjóðleikhúsið, Marta Nordal leikstýrir henni en þar mun Ólafía Hrönn einnig leika Skugga Svein.    

26. nóvember – Rung læknir eftir Jóhann Sigurjónsson í leikstjórn Vigdísar Hrefnu Pálsdóttur í þýðingu Bjarna Jónssonar.
Rung læknir var samið á dönsku árið 1905. Það fjallar um tilraunir Rungs læknis til að finna mótefni gegn berklum og um ástina í lífi hans. Verkið talar sterkt inn í samtímann nú þegar faraldur geisar og vísindamenn eru í óða önn við að þróa bóluefni.  Rung læknir hefur aldrei verið sett upp á sviði hér á landi en er af mörgum talið með athyglisverðustu verkum Jóhanns Sigurjónssonar. Vigdís Hrefna Pálsdóttir er nýkomin heim úr meistaranámi í leikstjórn frá Bretlandi og leikstýrir hér sínu fyrsta verki.

3. desember – Nýársnóttin eftir Indriða Einarsson í leikstjórn Hörpu Arnardóttur
Nýársnóttin var fyrst frumsýnd á annan í jólum árið 1907 hjá Leikfélagi Reykjavíkur og var síðar opnunarsýning Þjóðleikhússins árið 1950. Þar segir frá baráttu manna og álfa og er undra- og kynjaveröld verksins mörgum í fersku minni. Hér tekst Harpa Arnardóttir leikstjóri á við verk sem á sérstakan stað í hjarta hennar.

12. desember – Dóttir Faraós eftir Jón Trausta í leikstjórn Önnu Maríu Tómasdóttur
Jón Trausti er best þekktur fyrir skáldsögur sínar, t.d. Heiðarbýlið og Önnu frá Stóruborg en skrifaði leikritið Dóttir faraós árið 1914. Verkið hefur aldrei verið sett upp en er um margt forvitnilegt verk. Þar segir blind eldri kona barnabörnum sínum sögu um dóttur faraós sem kemur til Íslands í líki sels, Íslendingur verður ástfanginn af henni, stelur hamnum og kyrrsetur hana hjá sér. Verk um manninn í dýrinu og dýrið í manninum. Anna María Tómasdóttir lærði leikstjórn í New York og leikstýrir hér sínu fyrsta verki í Þjóðleikhúsinu.

17. desember 2020 – Ævintýri á gönguför eftir Hostrup í leikstjórn Hilmis Snæs Guðnasonar
Þó að alþýðukómedían Ævintýri á gönguför sé dönsk þá er hún hluti af menningarsögu okkar því verkið hefur verið sett upp á Íslandi reglulega í gegnum tíðina við fádæma vinsældir. Það var frumflutt árið 1882 og er eitt mest uppsetta verk íslenskrar leiklistarsögu. Þjóðleikhúsið býður landsmönnum upp á þennan ástsæla gamanleik rétt fyrir jól. Lögin úr verkinu eru landsmönnum mörgum að góðu kunn og er lagið Ég vil fá mér kærustu þeirra þekktast. Karl Olgeir Olgeirsson hefur umsjón með tónlistarflutningnum og fjöldi leikara Þjóðleikhússins tekur þátt í uppfærslunni í leikstjórn Hilmis Snæs Guðnasonar.

 

Tengdar fréttir

Innlent

Sviðslistir bannaðar: Tónleikum og sýningum frestað

Leiklist

Þjóðleikhúsið býður börnum í leikhús