Athugið þessi frétt er meira en 7 mánaða gömul.

Enn einn fellibylurinn dynur á Mið-Ameríku

Fellibylurinn Eta gekk yfir Mið-Ameríku fyrrihluta nóvember 2020 og kostaði minnst 200 mannslíf, þar af ekki færri en 150 í Gvatemala.
Fellibylurinn Eta gekk yfir Mið-Ameríku í liðinni viku og kostaði minnst 200 mannslíf, þar af ekki færri en 150 í Gvatemala. Mynd: AP
Byrjað er að rýma bæi við Atlantshafsströnd Hondúras þar sem annar fellibylurinn á tveimur vikum og sá þrítugasti á þessu ári mun taka land á morgun, sunnudag, gangi spár eftir.

Fellibylurinn Eta varð minnst 200 manns að fjörtjóni í Gvatemala, Hondúras, Níkaragva og víðar þegar hann fór þar um í síðustu viku, auk þess sem hann olli feiknartjóni á mannvirkjum. 

Varað við miklum flóðum og aurskriðum

Nú stefnir hitabeltisstormurinn Iota hraðbyri að ströndum sömu ríkja og mun að öllum líkindum ná styrk fellibyls áður en þangað kemur, með meðalvindhraða upp á allt að 54 metra á sekúndu, steypiregn og og sjávarflóð í farteskinu. Bandaríska fellibyljamiðstöðin varar við því að flóð og aurskriður geti orðið enn verri en ella í Hondúras og Níkaragva vegna undangenginna hamfara af völdum Eta.

Iota verður 30. fellibylurinn sem gengur yfir Mið-Ameríku, Karíbahafsríki og suðurströnd Bandaríkjanna á þessu ári. Svo margir fellibyljir hafa aldrei áður dunið yfir á einu og sama fellibyljatímabilinu vestra.