Slepptu því að lesa og horfðu strax á þáttinn. 

Hljómsveitin Blóðmör er skipuð þeim Hauki Þór Valdimarssyni, Matthíasi Stefánssyni og Árna Jökli Guðbjartssyni en piltarnir, sem ekki eru orðnir tvítugir, koma allir úr Kópavoginum. 

Í þætti dagsins kynnumst við hljómsveitinni betur og sjáum þá taka tvö lög á heimili graðhestarokksins, skemmtistaðnum Dillon, við Laugaveg. Eigandi Dillon, Jón Bjarni Steinsson, er einnig viðmælandi í þættinum og segir nokkrar goðsagnakenndar sögur af þeim tónleikum sem farið hafa fram í húsinu. 

Á morgun, föstudag, birtist í Spilara RÚV tónleikaupptaka frá Blóðmör sem enginn ætti að láta fram hjá sér fara. 

Undirtónar er ný íslensk tónlistarþáttaröð úr smiðju RÚV núll. Á hverjum fimmtudegi í sex vikur kemur nýr þáttur sem fjallar um eina hljómsveit eða tónlistarmann. Á föstudögum birtum við tónleika með þessum sömu tónlistarmönnum.