Mynd: AP
Athugið þessi frétt er meira en 11 mánaða gömul.
Óttast um afdrif 150 þorpsbúa í Gvatemala
Um 150 eru látnir eða er saknað eftir að aurskriða af völdum óveðursins Eta hreif heilt þorp með sér í Gvatemala í dag. Forsetinn Alejandro Giammattei greindi frá þessu í kvöld. Áður höfðu um tuttugu manns týnt lífi í Mið-Ameríku af völdum Eta, sem kom að landi í Níkaragva á þriðjudag sem fjórða stigs fellibylur.
Hermenn voru kvaddir á vettvang í Queja í norðurhluta landsins til að hefja björgunarstörf. Neyðarástand er í þorpinu að sögn forsetans, og gerir ausandi rigning hermönnunum erfitt fyirr. Um 2.500 íbúar í nærliggjandi þorpum misstu allar eigur sínar er aur lagði þorp þeirra í rúst.
Þó verulega hafi dregið úr styrk hitabeltislægðarinnar varar bandaríska fellibyljastofnunin við hættunni á flóðum víða í Mið-Ameríku.
