Athugið þessi frétt er meira en 8 mánaða gömul.

Síminn tapaði fyrir dómi og þarf að greiða skaðabætur

28.10.2020 - 10:33
Mynd með færslu
 Mynd: ´000 - 0´´
Síminn var í morgun dæmdur í Héraðsdómi Reykjavíkur til að greiða 111 milljónir króna í skaðabætur til Tölvunar, Snerpu og Hringiðunnar, auk kostnaðar. Upphaflegar kröfur hljóðuðu upp á þrjá milljarða króna. Dómurinn hefur ekki áhrif á afkomuhorfur félagsins, en Síminn hagnaðist um rúman milljarð á þriðja ársfjórðungi.

Þetta kemur fram í tilkynningu Símans til Kauphallar, en dómurinn hefur ekki verið birtur á vef Héraðsdóms Reykjavíkur. Stefnufjárhæðin í málunum nam tæpum milljarði.

Í tilkynningu Símans segir að málið megi rekja aftur til áranna 2005-2007 og byggt á því að Síminn hafi valdið Tölvuni, Snerpu og Hringiðunni tjóni á markaði vegna internetþjónustu. Síminn á eftir að meta það hvort dómnum verður áfrýjað til Landsréttar.

1,9 milljarða hagnaður það sem af er ári

Dómurinn féll daginn eftir að Síminn tilkynnti um afkomu sína á þriðja ársfjórðungi. Hagnaður fyrirtækisins á tímabilinu nam rúmum milljarði, samanborið við tæplega 900 milljóna króna hagnað á sama tíma í fyrra.

Hagnaður Símans fyrstu níu mánuði ársins nemur samtals tæpum 1,9 milljarði, en var 2,3 milljarðar fyrstu níu mánuði síðasta árs.

Í árshlutareikningi Símans kemur fram að áhrif COVID-19 á rekstur og sjóðsstreymi Símans séu óveruleg fyrstu níu mánuði ársins. Þrátt fyrir samdrátt í efnahagslífinu og óljós áhrif þess þá hefur eftirspurn eftir kjarnavörum félagsins haldist sterk, segir í yfirlýsingu stjórnar.