Höfuðstöðvar Sameinuðu þjóðanna í New York. Mynd: EPA
Athugið þessi frétt er meira en mánaðargömul.
Kórónuveirusmit í höfuðstöðvum SÞ
Öllum hefðbundnum fundum sem fara áttu fram í dag í höfuðstöðvum Sameinuðu þjóðanna í New York hefur verið aflýst eftir að tilkynnt var um kórónuveirusmit hjá fimm starfsmönnum einnar aðildarþjóðarinnar. Heilsugæsluþjónusta stofnunarinnar mælti með því að starfsfólkið hittist sem minnst vegna þessa, að því er kemur fram í tilkynningu frá forseta allsherjarþingsins.
Ekki kemur fram hverrar þjóðar starfsmennirnir eru sem veiktust. Fjölmiðlar hafa heimildir fyrir því að þeir séu frá Níger, sem á sæti í öryggisráðinu um þessar mundir. Fundur var fyrirhugaður í því í dag. Hann verður haldinn, en með fjarfundarbúnaði. Þetta er í fyrsta sinn sem þarf að aflýsa fundum í höfuðstöðvunum frá því að heimsfaraldurinn braust út í vetur.
