Athugið þessi frétt er meira en 11 mánaða gömul.

Óbreytt lánshæfiseinkunn ríkissjóðs– horfur neikvæðar

24.10.2020 - 06:50
Mynd með færslu
 Mynd: RÚV
Fitch Ratings birti í gær mat á lánshæfi ríkissjóðs. Langtímaeinkunnir í innlendri og erlendri mynt eru óbreyttar og standa í A. Horfur eru neikvæðar.

Í fréttatilkynningu Fitch segir að A lánshæfiseinkunn ríkissjóðs endurspegli m.a. háa landsframleiðslu á mann, góða stjórnarhætti, hátt þróunarstig og góða umgjörð viðskiptalífsins. Viðsnúningur hafi orðið í opinberum fjármálum í kjölfar efnahagssamdráttar vegna faraldursins. Einhæfur útflutningur og smæð hagkerfisins draga lánshæfiseinkunn landsins niður. 

Kosningar á næsta ári gætu leitt til slakara aðhalds í opinberum fjármálum. Aftur á móti hafi breið pólitísk samstaða um að byggja upp viðmótsþrótt í opinberum fjármálum og skuldalækkun seinustu ára stutt trúverðugleika ríkisins til lengri tíma. 

Neikvæðar horfur endurspegla hækkun skulda sem hlutfalls af landsframleiðslu og hættu á að faraldurinn verði langvarandi og færist í aukana sem myndi hafa neikvæð áhrif á efnahagslífið og fjármálakerfið. Það sem gæti leitt til lækkunar lánshæfiseinkunar er til dæmis neikvæð skuldaþróun, veikari hagvaxtarhorfur og verulegt útflæði fjármagns að mati Fitch Ratings.