Hið mikla óvissuástand sem nú ríkir samfélaginu vegna COVID-19 hafði líka sitt að segja í ákvörðuninni. „Við vitum ekkert hvernig þetta verður í janúar eða febrúar, hvort það verði yfir höfuð hægt að halda Söngvakeppni nema með einhverjum skrítnum hætti, án áhorfenda til dæmis.“ Rúnar segir að í Hollandi þar sem halda á Eurovision í maí sé reiknað með því að hægt verði að halda keppnina á mismunandi vegu, eftir ástandinu á faraldrinum. „Hollendingarnir eru held ég með plan A, B, C og D.“ A sé þá eins og venjuleg keppni, B verði án áhorfenda en keppendur mæti á staðinn, C að sumir keppendur komist en aðrir ekki. „Svo er síðasti möguleikinn að enginn fái að ferðast og keppnirnar fari þá fram hvert í sínu landi og linkað frá Hollandi yfir í öll löndin. Þá verði reglur um hvernig svið og ljós eigi að vera í hverju landi. En það verður keppni, þeir lofa því!“

Að sögn Rúnars hefur Daði gefið upp að hann ætli sér að vera á svipuðum slóðum og Think About Things í nýja Eurovision-laginu. „Þetta verður stuðlag og skemmtun. Hann er kominn með hugmynd að konsepti, myndbandi og texta, og er nú að fara að semja lagið út frá því.“