Engin söngvakeppni - Daði keppir fyrir hönd Íslands

Mynd með færslu
 Mynd: Baldur Kristjánsson - RÚV

Engin söngvakeppni - Daði keppir fyrir hönd Íslands

23.10.2020 - 10:51

Höfundar

Ríkisútvarpið hefur tekið þá ákvörðun að velja Daða Frey og gagnamagnið til að taka þátt í Eurovision-keppninni í Rotterdam á næsta ári. Daði vann Söngvakeppnina hér heima með laginu Think About Things og fór myndbandið við lagið og ekki síður danssporin sem eldur í sinu um netheima. Daða var af mörgum talinn mjög sigurstranglegur fyrir Eurovision-keppnina sem síðan var aflýst vegna kórónuveirufaraldursins.

Eftir að fyrir lá að ekkert Eurovision yrði í ár var ákveðið að löndin mættu senda þann keppanda sem vann í heimalandi sínu aftur en hann yrði þá að vera með nýtt lag. Þau gætu líka haldið nýja keppni og þá valið nýjan flytjanda og lag. 

Daði sagði í viðtali við þýska blaðið Berliner Zeitung í síðustu viku að hann væri reiðubúinn að taka þátt aftur í Eurovision en aðeins ef hann yrði valinn.  „Það er mikil vinna sem fylgir því að taka þátt í Söngvakeppni og á þessum tímapunkti sé ég ekki tilganginn að ganga í gegnum það aftur. Ef við færum beint í Eurovision gætum við einbeitt okkur alfarið að því.“

Í tilkynningu frá RÚV er haft eftir Skarphéðni Guðmundssyni, dagskrárstjóra, að hann sé ánægður með að Daði Frey hafi þekkst boðið. „Daði sigraði Söngvakeppnina 2020 með yfirburðum og viðtökurnar við íslenska framlaginu hafa aldrei verið svona góðar. Við erum því afar ánægð og stolt af því að geta sent þennan frábæra tónlistarmann og hans fólk út eins og til stóð að gera síðast.“

Hann segir að auðvitað hafi þurft að skoða margt þegar þessi ákvörðun var tekin en eftir mikla umhugsun hafi þeim fundist þetta það eina rétta í stöðunni. „ Ekki síst í ljósi hinnar fordæmalausu stöðu sem upp kom í ár að engin Eurovision-keppni hafi verið haldin í fyrsta skipti í sögunni. Okkur fannst það bæði rétt og sanngjarnt.“

Daði Freyr segir sjálfur í tilkynningunni að hann sé afar spenntur fyrir því að standa á Eurovision-sviðinu. „Við stefndum alltaf að því að sjá hversu langt við gætum komist í keppninni og það verður eins á næsta ári. Allt Gagnamagnið verður með. Aðalatriðið í þessu er að það verði gaman en ég held að það sé mest gaman að vinna. Nú vona ég bara að það verði haldin alvöru keppni.“ Lagið er ekki tilbúið en Daði segist vera með nokkrar hugmyndir í kollinum.

Tilkynningu RÚV má sjá hér að neðan.

 

Tónlistarmaðurinn Daði Freyr Pétursson keppir fyrir Íslands hönd í Eurovision-söngvakeppninni í Rotterdam í maí. RÚV leitaði til Daða Freys sem samþykkti að semja lag í keppnina.

Lagið Think About Things með Daða og Gagnamagninu sigraði Söngvakeppnina 2020 en vegna COVID-19 var hætt við Eurovision sem átti að fara fram í Rotterdam. Lagið sló þó heldur betur í gegn en það hefur nú þegar þetta er skrifað verið spilað tæplega 55 milljón sinnum á Spotify. Lagið vann áhorfendaverðlaunin í mörgum löndum Evrópu, m.a. í öllum hinum norrænu löndunum.

Það eina rétta í stöðunni

Skarphéðinn Guðmundsson dagskrárstjóri RÚV er ánægður með að Daði Freyr hafi þekkst boðið um að taka aftur þátt. „Daði sigraði Söngvakeppnina 2020 með yfirburðum og viðtökurnar við íslenska framlaginu hafa aldrei verið svona góðar. Við erum því afar ánægð og stolt af því að geta sent þennan frábæra tónlistarmann og hans fólk út eins og til stóð að gera síðast. Auðvitað þurfti að skoða margt þegar þessi ákvörðun var tekin en eftir mikla umhugsun fannst okkur þetta það eina rétta í stöðunni, ekki síst í ljósi hinnar fordæmalausu stöðu sem upp kom í ár að engin Eurovision-keppni hafi verið haldin í fyrsta skipti í sögunni. Okkur fannst það bæði rétt og sanngjarnt,“ segir Skarphéðinn og bætir við: „Við teljum að þjóðin vilji eindregið að Daði og Gagnamagnið keppi fyrir okkar hönd í þessari keppni. Auk þess er óvissan svo mikil í dag að það er ekki einu sinni víst að við getum haldið Söngvakeppni í febrúar með almennilegum hætti.“

Mest gaman að vinna

Daði Freyr er afar spenntur fyrir því að fá að standa á Eurovision-sviðinu: „Ég er mjög spenntur fyrir þessu. Ástæðan fyrir því að ég keppti í Söngvakeppninni 2020 var til að prófa að fara með Gagnamagnskrökkunum að upplifa Eurovision innan frá. Við stefndum alltaf að því að sjá hversu langt við gætum komist í keppninni og það verður eins á næsta ári. Allt Gagnamagnið verður með. Aðalatriðið í þessu er að það verði gaman en ég held að það sé mest gaman að vinna. Nú vona ég bara að það verði haldin alvöru keppni,“ segir hann. En er hann búinn að semja lagið? „Ég er kominn með nokkrar pælingar varðandi lagið en ekkert sem er ákveðið. Ég veit reyndar hvernig tónlistarmyndbandið verður og er með nokkur lykilatriði sem þurfa að koma fram í sviðsetningunni, svo ég mun semja lagið í kringum það. Ég mun reyna að semja lag sem passar við atriðið en ekki öfugt, Júró er alveg sér dæmi. En þetta verður stuðlag, það er alveg á hreinu. Allt sem er gaman!“

Vegleg tónlistardagskrá í undirbúningi

Það er því ljóst að það verður engin Söngvakeppni á næsta ári. Keppnin hefur verið með allra stærstu sjónvarpsviðburðum landsins síðustu ár en Skarphéðinn biður aðdáendur keppninnar að örvænta ekki. „Við verðum að sjálfsögðu með öfluga tónlistardagskrá í febrúar og mars, á þeim tíma sem Söngvakeppnin hefði farið fram og sú dagskrá mun að einhverju leyti tengjast Söngvakeppninni og Eurovision,“ segir hann. Þegar er hafinn undirbúningur að veglegri dagskrá þar sem tónlist og skemmtun verða í öndvegi.

Eurovision-söngvakeppnin verður í Rotterdam 18., 20. og 22. maí 2021.