Mynd: EPA-EFE - EPA
Athugið þessi frétt er meira en 11 mánaða gömul.
Írar eiga að halda sig heima næstu vikur
Rekstur fjölmargra fyrirtækja stöðvaðist í dag víðs vegar um Írland vegna ströngustu sóttvarnaraðgerða sem gripið hefur verið til í Evrópu í þessari bylgju kórónuveirufaraldursins. Landsmönnum, fimm milljónum talsins, hefur verið skipað að halda sig sem mest heima næstu sex vikur.
Öllum verslunum hefur verið lokað, nema þeim sem selja brýnustu nauðsynjar. Fólk má fara til og frá vinnu og þeir sem vilja viðra sig mega ekki fara lengra en fimm kílómetra frá heimilum sínum. Víða í Evrópu eru strangar sóttvarnarreglur í gildi, svo sem í Póllandi, Tékklandi, Frakklandi og á Ítalíu svo nokkur lönd séu nefnd.
