Lagið um það sem er samkomubannað

Mynd: Sigurður Guðmundsson / Sigurður Guðmundsson

Lagið um það sem er samkomubannað

20.10.2020 - 09:18
Í fyrstu bylgju faraldursins flutti Sigurður Guðmundsson nýjan texta Braga Valdimars Skúlasonar við lagið um það sem er bannað í umræðuþætti um COVID-19 þar sem lögð var áhersla á börn og ungmenni. Textinn á jafn vel við núna og þá.

Nú er ljóst að núgildandi samkomutakmarkanir verða í gildi næstu þrjár vikur og þá er mikilvægt að við stöndum saman. Því gæti verið gott að rifja upp þetta lag um það sem er samkomubannað. Bíðum með að knúsa fólk, pössum tvo metrana og ekki fara í bæinn og lenda í skrúfusleikjum eins og kemur fram í textanum í laginu um það sem er samkomubannað. 

Textann við lagið má sjá hér fyrir neðan.

Það má ekki snerta næsta mann
og láttu alveg vera að knúsa hann.
Þetta er ekki flókið en ef þú ert í vafa
— ekki koma nálægt ömmu og afa.
 
Það má ekki gefa neinum fæv,
annars verður ríkisstjórnin æf.
Ekki setja ananas í körfu út á Granda.
Vanda, branda, gættu þinna handa.
 
Þetta samkomubann er svo skrítið,
Það er aðeins að hefta mann.
Jafnvel þó maður geri (annars) aldrei neitt.
Það er aaaðeins að hefta mann.

Það má ekki mæta og hlusta á mig.
Og ekki (láta) ferma, gifta og jarða sig.
Ekki far'í bæinn og lend'í skrúfusleikjum.
Og hættið strax að deila feisbúkkleikjum.
 
Það má ekki skjótast upp í sveit
og ekki svindl'á appinu – það veit.
Reyndu að hlýða Víði og gegna þessu fljótt því
annars lendir þjóðin öll í sóttkví.
 
Þetta samkomubann er svo skrítið,
Það er aðeins að hefta mann.
Jafnvel þó maður geri (annars) aldrei neitt.
Það er aaaðeins að hefta mann.