Athugið þessi frétt er meira en mánaðargömul.

Ósamræmi í minnisblaði og reglugerð veldur ruglingi

19.10.2020 - 16:06
Mynd með færslu
 Mynd: UMFÍ
Framkvæmdastjóri Ungmennafélags Íslands segir að það valdi ruglingi að ekki sé samræmi á milli minnisblaðs sóttvarnalæknis og reglugerðar heilbrigðisráðuneytis varðandi íþróttaiðkun. Það valdi ruglingi um hvaða upplýsingar eigi að veita foreldrum og forráðamönnum íþróttafélaganna

Á morgun taka gildi nýjar reglur um íþróttastarf án snertingar verður leyfilegt, þó með ýmsum takmörkunum. Íbúar höfuðborgarsvæðisins geta stundað íþróttir í skipulögðum hópíþróttatíma þar sem þátttakendur eru skráðir. Þeir verða þó að virða 2 metra regluna, mega ekki deila búnaði meðan á æfingu stendur og sótthreinsa verður allan búnað á milli tíma.

Auður Inga Þorsteinsdóttir, framkvæmdastjóri UMFÍ, segir í frétt af vef UMFÍ að það sé ekki gott þegar reglugerð ráðuneytis sé ekki samhljóða minnisblaði sóttvarnalæknis. Það skapi rugling.

„Ég upplifi að forsvarsmenn félaga eiga erfitt með að skilja það sem fram kemur í minnisblaði Þórólfs og reglugerðinni. Það eru allir að reyna að finna út úr því hvar þeir standa og hvaða upplýsingar þeir eiga að veita forráðamönnum þar sem reglugerðin tekur gildi á morgun. Það er ekki gott þegar reglugerðin er opnari en tilmæli Þórólfs. Það skapar sundrung. En við höfum þvert á móti þörf fyrir samstöðu og samræmda starfsemi,“ segir hún.

Sundlaugar lokaðar almenningi en má opna til æfinga

Á fundi ÍSÍ með forsvarsmönnum sérsambandanna og yfirvalda auk fulltrúa UMFÍ í morgun kom fram að tilmælin eigi við um sund og boltaíþróttir með þeim skilyrðum að iðkendur noti eigin bolta og undirgangist ýmsar kvaðir sem snúa að persónulegum smitvörnum. Þótt sundlaugar séu lokaðar almenningi þá má opna þær fyrir iðkendum og skólahópum svo lengi sem gætt er að fjöldatakmörkun fullorðinna.

Niðurstaða fundarins var sú að íþróttaæfingar barna á höfuðborgarsvæðinu sem fædd eru árið 2005 eða síðar mega hefja æfingar á ný. Engin fjöldatakmörkun er á æfingum barna. Ekki skal blanda skólahópum saman, þ.e. hópum barna úr mismunandi skólum sem eru alla jafna ekki saman og foreldrum er gert að fylgjast ekki með æfingum. 

Íþróttaæfingar fullorðinna á höfuðborgarsvæðinu í snertilausum íþróttagreinum mega fara fram. Þar á meðal eru boltaíþróttir ef iðkendur koma með eigin bolta á æfingu og grípa ekki bolta annarra. Snerting er óheimil. Gæta verður að tveggja metra fjarlægðarreglu og að einungis 20 fullorðnir einstaklingar séu saman í hólfi. Hvert hólf þarf að vera aðgreint með greinilegum hætti.

Gæta þarf vel að sóttvörnum á öllum æfingum. Spritt þarf að vera aðgengilegt á æfingum og við æfingasvæði.Sótthreinsa þarf búnað eftir æfingu.Þurfi iðkandi að hósta eða hnerra á æfingu skal gera það í olnboga og gæta þarf vel að loftræstingu og loftgæðum inni í íþróttahúsum.

Að sama skapi getur fólk hafið æfingar í líkamsræktarstöð og nota frjáls lóð og áföst hjól. En ekki skal nota stóran veggfastan búnað.

Íþróttastarf á vegum ÍSÍ á höfuðborgarsvæðinu, þar sem snertingar er krafist, er bannað til og með 3. nóvember. Sundlaugar á höfuðborgarsvæðinu verða lokaðar og veitingastaðir á þessu svæði þurfa að loka tveimur fyrr en landsbyggðin eða klukkan 21.

Reglugerðin sjálf gildir til 10.nóvember og þar er meðal annars kveðið á um tveggja metra regluna, aukna grímuskyldu og að samkomutakmarkanir skuli miðast við 20 manns um allt land. Þetta á þó ekki við um útfarir þar sem leyfilegur fjöldi er 50 manns.